Batumelebi | შუახევში ბათუმი-ხულოს გზის 10-კილომეტრიანი მონაკვეთის რეაბილიტაცია იგეგმება შუახევში ბათუმი-ხულოს გზის 10-კილომეტრიანი მონაკვეთის რეაბილიტაცია იგეგმება – Batumelebi
RU | GE  

შუახევში ბათუმი-ხულოს გზის 10-კილომეტრიანი მონაკვეთის რეაბილიტაცია იგეგმება

შუახევის ტერიტორიაზე, შიდასახელმწიფოებრივი მნიშვნელობის ბათუმი [ანგისა]-ახალციხის საავტომობილო გზის დაახლოებით 10-კილომეტრიანი მონაკვეთის რეაბილიტაცია იგეგმება. სამუშაოებისთვის 11 542 550 ლარია გათვალისწინებული. საქართველოს საავტომობილო გზების დეპარტამენტმა ტენდერი უკვე გამოაცხადა.

გზის სარეაბილიტაციო მონაკვეთი დაბა ხიჭაურიდან იწყება და დაახლოებით ჩანჩხალოს გადასახვევთან სრულდება. დეპარტამენტის ინფორმაციით, საპროექტო გზის გარკვეული მონაკვეთი გადის დაბა შუახევის ტერიტორიაზე, „სადაც ამჟამად მიმდინარეობს სარეაბილიტაციო სამუშაოები და შესაბამისად, ხსენებული მონაკვეთი დავალების თანახმად ამოღებულია საპროექტო დოკუმენტაციიდან. საპროექტო მონაკვეთის სიგრძეა 8 978 მეტრი [დაბა შუახევის მონაკვეთის გამოკლებით]“.

ტენდერში გამარჯვებული ვალდებულია, სამუშაოები 18 თვეში დაასრულოს, თუმცა მას არ აქვს უფლება სამუშაოები დაიწყოს დეპარტამენტის წერილობითი დავალების მიღებამდე.

ტენდერში წინადადებების მიღება კი, 2020 წლის 19 მარტს დაიწყება და 24 მარტს დასრულდება.

ტენდერიდან:

  • საპროექტო გზა გადის მთიან რელიეფში, დასახლებულ და დაუსახლებელ ტერიტორიაზე. გზის როგორც გრძივი, ასევე განივი პარამეტრები დარღვეულია. საპროექტო გზაზე არის ორი ხიდი, აქედან ერთი სარეაბილიტაციოა; საკვლევ მონაკვეთზე სავალი ნაწილის სიგანე 5-6 მეტრის ფარგლებში, ხოლო გვერდულების – 0-1 მეტრის ფარგლებში მერყეობს. საპროექტო გზაზე 32 მილია – აქედან 25 მილი გამოსაცვლელია, 7 – სარეაბილიტაციო.
  • საავტომობილო გზის სიგანემ უნდა უზრუნველყოს ურთიერთსაწინააღმდეგოდ მოძრავი სატრანსპორტო ნაკადის უსაფრთხო გამტარუნარიანობა და ამავე დროს მისი სიგანე უნდა შეესაბამებოდეს ნორმების მინიმალურ მოთხოვნებს.
  • საპროექტო გზის ფუნქციური დატვირთვის, ამჟამინდელი და მომავალი სატრანსპორტო ნაკადის ინტენსივობის და არსებული მიმართულების გათვალისწინებით, შერჩეული იქნა საანგარიშო სიჩქარე – 40 კმ/სთ.
  • დეტალური პროექტირებისთვის საჭირო საველე გეოტექნიკური კვლევები შესრულდა 2019 წლის ივნისის თვეში. საველე სამუშაოების დასრულების შემდეგ დაიწყო ლაბორატორიული გამოცდები, რომლებიც 2019 წლის ივლისში დასრულდა.

გზის აღნიშნული მონაკვეთის რეაბილიტაციისთვის საჭირო პროექტი სატენდერო დოკუმენტებს თან ახლავს.

გზის სარეაბილიტაციო მონაკვეთი / პროექტიდან

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com