Batumelebi | როგორ უნდა მოვიქცეთ თვითიზოლაციისას – დეტალური რეკომენდაციები როგორ უნდა მოვიქცეთ თვითიზოლაციისას – დეტალური რეკომენდაციები – Batumelebi
RU | GE  

როგორ უნდა მოვიქცეთ თვითიზოლაციისას – დეტალური რეკომენდაციები

იმ ადამიანებს, რომლებიც უცხო ქვეყნებიდან, განსაკუთრებით კი ჩინეთიდან, ირანიდან, იტალიიდან და სამხრეთ კორეიდან შემოდიან საქართველოში, ახალი კორონავირუსით დაინფიცირების საფრთხის გათვალისწინებით, საქართველოს დაავადებათა კონტროლის ცენტრი ურჩევს, რომ 14 დღის განმავლობაში თვითიზოლაციაში იყვნენ.

რა არის თვითიზოლაცია?

თვითიზოლაცია გულისხმობს თავი შორს დაიჭიროთ ისეთი სიტუაციებისგან, სადაც შეიძლება სხვა ადამიანები დააინფიციროთ. ეს გულისხმობს ნებისმიერ ადგილსა და სიტუაციას, როცა შესაძლოა ახლო კონტაქტში (იგულისხმება კონტაქტი 1 მეტრის დისტანციაზე, 15 წუთზე მეტი ხნით) შეხვიდეთ სხვა ადამიანებთან,  მაგალითად – სამსახური, სკოლა, საბავშვო ბაღი, უნივერსიტეტი თუ სხვა საგანმანათლებლო დაწესებულებები, რელიგიური შინაარსის შეკრებები, სპორტული ღონისძიებები, რესტორნები და ნებისმიერი სხვა საზოგადოებრივი თავშეყრის ფორმები თუ ადგილები.

გთავაზობთ საქართველოს საგარეო სამინისტროს დეტალურ რჩევებს თვითიზოლაციის შესახებ.

  • იზოლაციაში უნდა იყოთ დაავადების გამომწვევთან კონტაქტის ბოლო თარიღიდან 14 დღის განმავლობაში (ვადის განსაზღვრაში დაგეხმარებათ საზოგადოებრივი ჯანმრთელობის შესაბამისი უწყების წარმომადგენელი) და აკონტროლოთ საკუთარი ჯანმრთელობა;
  • თვითიზოლაციის სივრცეში არ არის რეკომენდებული ვიზიტორებისა და სტუმრების მიღება;
  • დასაშვებია არაპირდაპირი კონტაქტით საკვების გადაცემა.
  • თუ თქვენთან ერთად ერთიან საცხოვრებელ სივრცეში იმყოფება სხვა პირი/პირები, მათთან კონტაქტი უნდა იყოს მინიმალური. არ დაიშვება 1 მეტრზე ახლო კონტაქტი 15 წუთზე მეტ ხანს.
  • იზოლაციის პერიოდში უნდა გქონდეთ განცალკევებული ჭურჭელი (ჭიქა, თეფში, კოვზი და ა.შ.), პირსახოცი, საწოლი;
  • დასაშვებია იქონიოთ სატელეფონო კავშირი და ისარგებლოთ ინტერნეტით;
  • ამ დროის განმავლობაში საზოგადოებრივი ჯანმრთელობის შესაბამისი უწყებები განახორციელებენ თქვენს მონიტორინგს. ჯანმრთელობის მონიტორინგი შეიძლება განხორციელდეს თქვენთან უშუალო კონტაქტის გარეშე – ტემპერატურის თვითგაზომვით, სიმპტომების გამოვლენისას – თვითანგარიშგებით;
  • თუ აღგენიშნებათ ცხელების და ან რესპირატორული ვირუსული ინფექციის მსგავსი კლინიკური ნიშნები, დაუყოვნებლივ უნდა მიმართოთ ინფექციური პროფილის (რეფერალურ) სტაციონარს;
  • თუ დაგჭირდათ არაგადამდები დაავადების (მაგ; ქირურგიული, გინეკოლოგიური და სხვა) სასწრაფო სტაციონარული სამედიცინო დახმარება, თქვენი კლინიკაში ტრანსპორტირება განხორციელდება სპეციალური ავტოტრანსპორტით, სტაციონარში მოთავსდებით ბოქსირებულ პალატაში საიზოლაციო პერიოდის ვადის გასვლამდე;
  • ზოგადად, კრიზისის დროს სევდა, სტრესი, დაბნეულობა, შიში ან ბრაზი ნორმალურია. ასეთ დროს დაგეხმარებათ საუბარი ისეთ ადამიანებთან, ვისაც ენდობით. დაუკავშირდით თქვენს ოჯახს, მეგობრებს;
  • ემოციებთან გასამკლავებლად არ გამოიყენოთ თამბაქო, ალკოჰოლი ან სხვა ნივთიერებები;
  • დაიცავით ცხოვრების ჯანსაღი წესი – იკვებეთ ჯანსაღად, დაისვენეთ, იყავით ფიზიკურად აქტიური და იქონიეთ სოციალური კონტაქტი თქვენთვის ძვირფას ადამიანებთან ტელეფონით ან ელექტრონული ფოსტით.

დამატებითი ინფორმაციისთვის შეგიძლიათ დარეკოთ:

1505 (24/7 განმავლობაში) – საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო ან ეწვიეთ ვებგვერდს

116001 (ორშაბათი-პარასკევი, 10:00-18:00) – დაავადებათა კონტროლისა და საზოგადოებრივი ჯანმრთელობის ეროვნული ცენტრი ან ეწვიეთ ვებგვერდს 

__________________

ასევე, გთავაზობთ ახალი ზელანდიისა და ინგლისის საზოგადოებრივი ჯანდაცვის ცენტრების რამდენიმე დეტალურ რჩევას თვითიზოლაციასთან დაკავშირებით:

სხვებთან ერთად ცხოვრება

მაშინ, როცა ვერ ხერხდება სრულად იზოლირება სახლის სხვა მცხოვრებლებისგან, აუცილებელია იყოთ ოთახში, რომელიც კარგად ნიავდება, აქვს გარეთ გამავალი ფანჯარა, რომელიც იღება. დახურეთ კარი და ეცადეთ, არ გქონდეთ ახლო ფიზიკური კონტაქტი სახლში მყოფ სხვა ადამიანებთან.

დაიცავით ჰიგიენა ხველებისა და ცემინებისას, დაიბანეთ ხელები

დაიფარეთ ცხვირი და პირი ხელსახოცით ან მკლავით, როცა აცემინებთ ან ახველებთ. გადააგდეთ გამოყენებული ხელსახოცი დახურულ ურნაში და დაუყოვნებლივ დაიბანეთ ხელები საპნითა და წყლით მინიმუმ 20 წამის განმავლობაში, შემდეგ კი კარგად გაიშრეთ. ასევე შეგიძლიათ გამოიყენოთ ხელის სანიტაიზერი. მოერიდეთ დაუბანელი ხელით შეხებას თვალზე, ცხვირსა და პირზე.

საკვები პროდუქტების შეძენა

დაუკავშირდით მეგობარს, ოჯახის წევრსა თუ მიტანის სერვისებს, რათა თქვენ ნაცვლად შეიძინოს პროდუქტები მაღაზიაში ან წამლები აფთიაქში. ითხოვეთ დახმარება, თუ გჭირდებათ საკვების, სხვა სახის პროდუქტებისა და  წამლების შეძენა. კიდევ ერთი ალტერნატივაა, შეუკვეთეთ ეს სერვისი ონლაინაპლიკაციით ან ტელეფონით. შეკვეთის ინსტრუქციაში ნათლად უნდა განაცხადოთ, რომ შეკვეთა დატოვონ გარეთ, სადარბაზოში ან სხვა, შესაბამის ადგილას, რათა არ გქონდეთ კონტაქტი კურიერთან. 

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან