5 დასახელების რძის პროდუქტი მცენარეულ ცხიმებს შეიცავს, რაც ეტიკეტზე მითითებული არ არის

არასამთავრობო ორგანიზაცია „საქართველოს სტრატეგიული კვლევებისა და განვითარების ცენტრის“ ვებგვერდის, momxmarebeli.ge-ს ინფორმაციით, არაჟანში „ქობულეთური“ და კიდევ ოთხი დასახელების რძის პროდუქტში, მცენარეული წარმოშობის ცხიმები აღმოჩნდა. პროდუქტები რძის ცხიმის სისუფთავეზე შემოწმდა.

პროდუქტები, ვებგვერდზე გამოქვეყნებული დოკუმენტის მიხედვით, ლაბორატორიულად 2020 წლის 14 თებერვალს შემოწმდა.

„პროდუქტი რძის ცხიმის გარდა შეიცავს სხვა ცხიმების ნარევს, მათ შორის მცენარეულ ცხიმებს,“ – წერია ლაბორატორიის დასკვნაში.

საქართველოს კანონმდებლობით, „რძისა და რძის ნაწარმის შესახებ“, პროდუქტი რომელშიც რძის ცხიმი ჩანაცვლებულია მცენარეული ცხიმით ან სხვა ინგრედიენტით, არ წარმოადგენს რძის პროდუქტს და მას არ უნდა ჰქონდეს მითითებული, რომ რძის პროდუქტია.

„წინააღმდეგ შემთხვევაში, მომხმარებელი შეცდომაში შედის და რძის ნაცვლად სხვა პროდუქტს იძენს,“- წერია კანონში.

გარდა არაჟანი „ქობულეთურისა“, მცენარეული ცხიმი კიდევ 4 დასახელების პროდუქტში აღმოჩნდა, რომლებსაც ეწერა, რომ რძის პროდუქტია.

არაჟანი „ქობულეთური“

ასეთია: 82%-იანი ნაღების კარაქი „რანინა“ (შესყიდულია გუდვილში), რომელიც ეტიკეტის მიხედვით დამზადებულია საქართველოში.

ნაღების კარაქი „რანინა“

ასევე საქართველოში დამზადებული სულგუნი (შეძენილია კარფურში), ინდმეწარმე ნოდარ ლაზარეშვილის მიერ.

ყველი „სულგუნი“

„ყველი იმერული“ (შეძენილია ასევე კარფურში)

„ყველი იმერული“

და „ყველი ქარხნული“  (შეძენილია ფუდმარტში), მწარმოებელი ქვეყანა არის საქართველო და დამზადებულია შპს „მილკენის“ მიერ.

„ყველი ქარხნული“

„რძისა და რძის ნაწარმის შესახებ“ ტექნიკური რეგლამენტის მიხედვით, რძის ნაწარმი კვების რაციონის აუცილებელ შემადგენელ ნაწილს წარმოადგენს და ძალიან მნიშვნელოვანია ადამიანის, განსაკუთრებით ბავშვების ჯანმრთლობისთვის.

ამ პერიოდში ორგანიზაციამ თბილისის სხვადასხვა მაღაზიაში 36 დასახელების პროდუქტი შეიძინა და ლაბორატორიულად შეამოწმა.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com