ბათუმის მერია მშენებლობის დროს საზოგადოებრივი სივრცეებისა და მუნიციპალური ინფრასტრუქტურის გამოყენებისთვის გადასახადის დაწესებას ითხოვს. განკარგულების შესაბამისი პროექტი უკვე მომზადებულია და საკრებულოს სხდომის დღის წესრიგშია შეტანილი. საკრებულო საკითხის დამტკიცებაზე 25 თებერვალს იმსჯელებს.
პროექტის მიხედვით სამშენებლო ღობის მოსაწყობად გადასახადის ოდენობა ერთ კვადრატულ მეტრზე ზონების მიხედვით გადანაწილდება:
- ცენტრალური ზონის პირველი ქვეზონა – 100 ლარი
- ცენტრალური ზონის მეორე ქვეზონა – 75 ლარი
- ცენტრალური ზონის მესამე ქვეზონა – 50 ლარი
- შუალედური ზონა – 40 ლარი
- პერიფერიული ზონა – 30 ლარი
ასევე, დაწესდება საზოგადოებრივ სივრცეში მშენებლობასთან დაკავშირებული ხელსაწყოების, მათ შორის, კიბის უჯრედის, აგრეგატის და სხვა მსგავსი მოწყობილობების განთავსების გადასახადი. ამ ტიპის საჭიროებებისთვის ერთი კვადრატული მეტრის გადასახადი 40 ლარი იქნება წინასწარ განსაზღვრული ვადით.
მშენებლებს მოუწევთ ასევე გზაჯვარედინებზე არსებული მიწისქვეშა საკომუნიკაციო არხებით სარგებლობის გადასახადის გადახდა, ერთი გრძივი მეტრის ფასი 300 ლარი იქნება.
ფასიანი იქნება ასევე სანიაღვრე არხებში გრუნტის წყლების ჩაშვება, გადასახადი ქვაბულის ზედაპირის ყოველ ერთ კვადრატულ მეტრზე 10 ლარი იქნება.
სანიაღვრე სისტემისთვის ახალი ობიექტის მიერთების გადასახადი კი ასე გადანაწილდება:
- დ110მმ ქსელის შეჭრა/ მიერთება – 1200 ლარი
- დ150მმ ქსელის შეჭრა/ მიერთება – 1650 ლარი
- დ200მმ ქსელის შეჭრა/ მიერთება – 2250 ლარი
ამ გადასახადების გადახდა მშენებლებს მოუწევთ ერთჯერადად, მშენებლობის ნებართვის მიღებამდე. დადგენილების პროექტის მიხედვით, ზემოთ ჩამოთვლილი გადასახადებისგან მხოლოდ სახელმწიფო სტრუქტურები გათავისუფლდებიან.
გასულ წელს ბათუმის მერიამ მშენებლობის ნებართვის მოსაკრებლის გამოთვლის წესიც შეცვალა.
ამ თემაზე:
ბათუმის მერია მშენებლობასა და დემონტაჟზე ახალ მოსაკრებელს აწესებს
