ბავშვთა ტრეფიკინგში ბრალდებულ ორ ქალს პროკურატურამ საპროცესო შეთანხმება გაუფორმა. მათ 14-დან 17 წლამდე თავისუფლების აღკვეთა ელოდათ. გადაწყვეტილება მოსამართლე ვიოლეტა ფორჩხიძემ მიიღო.
პროკურატურის ვერსიით, ბრალდებული ქალები 4 მცირეწლოვანი ბავშვის დედა და დეიდა იყვნენ და ბავშვებს ბათუმში, ქუჩაში მათხოვრობას აიძულებდნენ. ბრალდებულები თავდაპირველად ბრალს არ აღიარებდნენ, თუმცა საბოლოოდ მათ აღიარებითი ჩვენების მიცემა გადაწყვიტეს.
„ტრეფიკინგის მუხლზე საპროცესო შეთანხმება არ კეთდება, მაგრამ პროკურატურამ გაითვალისწინა ბევრი გარემოება, მათ შორის, ის, რომ ბრალდებული ბავშვების დედაა, მეორე – დეიდა, მათ წინააღმდეგობა დაკავების დროს არ გაუწევიათ და ასე შემდეგ,“ – ამბობს ადვოკატი მზია ზოიძე. მისი თქმით, საქმეზე გამამტყუნებელი განაჩენის შესაძლებლობა დიდი იყო, რადგან არსებობდა მოწმეთა ჩვენებები და ვიდეოკადრებიც.
სასამართლოს გადაწყვეტილებით, მცირეწლოვანი ბავშვების დედას 5 წელი მოუწევს ციხეში ყოფნა, 4 წელი კი, პირობითი მსჯავრის ქვეშ ექნება. მეორე ბრალდებულს კი 4 წლით მიუსაჯეს თავისუფლების აღკვეთა, 4 წელი – პირობითი.
