თბილისში მცხოვრებ კაცს ბ.ბ.-ს 2 წლით გამოსაცდელი ვადა შეუფარდეს ქალზე ადევნებისთვის. განაჩენის მიხედვით, ის ორი წლის განმავლობაში „ახორციელებდა ადევნებას“.
განაჩენის მიხედვით, ბრალდებული 2018 წლის მარტიდან 2019 წლის ოქტომბრის ჩათვლით „ახორციელებდა ადევნებას ე.პ.-ს მიმართ. არ აძლევდა ამ უკანასკნელს ნორმალური ცხოვრების საშუალებას, სისტემრატრად მიდიოდა და უთვალთვალებდა, როგორც სამუშაო ადგილას, ასევე საცხოვრებელ სახლთან… ტელეფონის საშუალებით ასევე ამყარებდა არასასურველ კომუნიკაციას, მუდმივად ურეკავდა და წერდა მოკლე ტექსტური სახის შეტყობინებებს,“ – აღნიშნულია განაჩენში.
დაზარალებულის ჩვენებით, ამ ქმედებებმა მისი ფსიქიკური ტანჯვა გამოიწვია და „ცხოვრების წესის მნიშვნელოვნად შეცვლის რეალური საჭიროება.“
ბრალდებულმა დანაშაული სრულად აღიარა. მას სადავოდ არ გაუხდია ამ საქმეზე შეგროვებული მტკიცებულებები.
„ადევნების ნებისმიერი ობიექტი, უპირველეს ყოვლისა, „ფსიქოტერორის“ მსხვერპლია,“ – აღნიშნავს მოსამართლე ლავრენტი მაღლაკელიძე განაჩენში. – „სასამართლო აღნიშნავს, რომ ამ დანაშაულისგან სისხლისსამართლებრივი დაცვის ობიექტია პირის უფლება, დაცული იყოს სხვა პირთა მხრიდან არასასურველი კომუნიკაციისაგან, უფლება იცხოვროს მშვიდ, მყუდრო გარემოში. ნორმა იცავს ადამიანის ცხოვრების ინდივიდუალურ სფეროს, მის თავისუფლებასა და გადაწყვეტილების მიღების თუ თავისუფლად მოქმედების შესაძლებლობას. გარდა ამისა, ამას ემატება შინაგანი სიმშვიდის უფლების დაცვა“.
მოსამართლე ლავრენტი მაღლაკელიძემ ბრალდებულს ერთი წლით თავისუფლების აღკვეთა შეუფარდა, რაც ჩაუთვალა პირობით და ორწლიანი გამოსაცდელი ვადა დაუნიშნა.
