Batumelebi | ვინ შეძლებს გერმანიაში დასაქმებას – გერმანიის საელჩოს განმარტება ვინ შეძლებს გერმანიაში დასაქმებას – გერმანიის საელჩოს განმარტება – Batumelebi

ვინ შეძლებს გერმანიაში დასაქმებას – გერმანიის საელჩოს განმარტება

„გერმანიის ფარგლებს გარეთ მიღებული პროფესიული კვალიფიკაციის აღიარება გერმანიის ადგილობრივი სავაჭრო პალატების პრეროგატივაა…“ – მოგვწერეს გერმანიის საელჩოდან. საელჩოს „ბათუმელებმა“ რამდენიმე კითხვით მიმართა გერმანიაში დასაქმების შესახებ – პირველი მარტიდან გერმანიაში საქართველოს მოქალაქეებს ლეგალურად დასაქმება შეუძლიათ, მათ შორის, მათ, ვისაც პროფესიული განათლება აქვთ.

გერმანიის კანონმდებლობის მიხედვით, პროფესიული განათლების ხანგრძლივობა ორი წელი უნდა იყოს იმისთვის, რომ თქვენი კვალიფიკაცია გერმანულმა მხარემ დაადასტუროს. გერმანიის საელჩოს ვკითხეთ, რომელი უწყებები ახდენენ საქართველოში მიღებული უმაღლესი და პროფესიული განათლების კვალიფიკაციის დადასტურებას და რა ხდება იმ შემთხვევაში, თუკი საქართველოს მოქალაქეს ორწლიანი პროფესიული განათლება არ აქვს?

„გერმანიაში სამუშაოდ გამგზავრების წინაპირობა არის ის, რომ გერმანიაში აღიარებული იქნეს გერმანიის ფარგლებს გარეთ მიღებული პროფესიული განათლების დიპლომი. როგორც წესი, აღიარებისთვის საჭიროა პროფესიული განათლების მინიმუმ ორწლიანი კურსის გავლა.

გერმანიის ფარგლებს გარეთ მიღებული პროფესიული კვალიფიკაციის აღიარება გერმანიის ადგილობრივი სავაჭრო პალატების პრეროგატივაა. ყველას შეუძლია ამ ვებგვერდზე https://www.anerkennung-in-deutschland.de/tools/berater/de/ ჩაწეროს თავისი პროფესია და მიუთითოს ადგილი გერმანიაში, სადაც მას სურს დასაქმება, რის შემდეგაც ვებგვერდი უჩვენებს, თუ რომელი გერმანული უწყებაა კომპეტენტური მისი პროფესიული კვალიფიკაციის აღიარებისათვის,“ – მოგვწერეს გერმანიის საელჩოდან.

აკადემიური კვალიფიკაციის [უმაღლესი განათლების] აღიარებას ახორციელებს გერმანიის კულტურის სამინისტროთა კონფერენცია. ყველას აქვს შესაძლებლობა „anabin“-ის მონაცემთა ბაზაში (https://anabin.kmk.org/anabin.html) გადაამოწმებს, აღიარებულია თუ არა მისი უნივერსიტეტის დიპლომი გერმანიაში. თუ მონაცემთა ბაზაში თქვენი სპეციალობა არ არის მოცემული, მაშინ საკვალიფიკაციო საბუთები აღიარებისთვის ეგზავნება კულტურის სამინისტროთა კონფერენციას,“ – მოგვწერეს გერმანიის საელჩოდან.

2020 წლის პირველ მარტს გერმანიაში ძალაში შევა „სპეციალისტთა იმიგრაციის შესახებ“ კანონი, რომლითაც შეიცვლება ქვეყანაში ყოფნის შესახებ უკვე მოქმედი კანონისა და უცხოელთა დასაქმების შესახებ დადგენილების შესაბამისი დებულებები. გერმანიის საელჩოს განმარტებით, ამ ეტაპზე შეზღუდული არ არის სფეროები, სადაც დასაქმებაა შესაძლებელი.

„ჩვეულებრივ ყველა პროფესიაში არის შესაძლებელი დასაქმება. ამისათვის, უბრალოდ, საჭიროა, რომ ვიზის მოთხოვნამდე აღიარებული იყოს დაინტერესებული პირის პროფესიული კვალიფიკაცია,“ – გვიპასუხეს გერმანიის საელჩოში.

ვიზის საფასური 75 ევროა.

_____

ვის შეუძლია მარტიდან გერმანიაში დასაქმება

ნეტგაზეთის მასალების სხვა გამოცემებში გადაბეჭდვის წესი
ავტორი