ბათუმის მერიასთან ამ დრომდე გრძელდება ოპოზიციის აქცია. მერიის შენობაში უმაღლესმა საბჭომ სხდომა ჩაატარა. აქციაზე შეკრებილები აცხადებენ, რომ დღეიდან საკრებულოსa და უმაღლესი საბჭოს ყველა სხდომის ჩაშლას შეეცდებიან შენობის პიკეტირებით, ვიდრე ხელისუფლება დანაპირებს არ შეასრულებს და პროპორციულ საარჩევნო სისტემას არ დათანხმდება.
ადგილზე მობილიზებულია პოლიცია.
“ყველა დანარჩენი საკითხი დღეს არის უმნიშვნელო… ჩვენ არ გვეშინია იმის, რომ ვინმეს დააკავებენ. პიკეტირების შესახებ გადაწყვეტილება გაერთიანებულმა ოპოზიციამ ქვეყნის მასშტაბით მიიღო, ჩვენ ყველა სხდომაზე შევუქმნით დისკომფორტს ხელისუფლებას,” – გვითხრა უმაღლესი საბჭოს წევრმა ენმ-დან ელგუჯა ბაგრატიონმა.
ოპოზიციის წარმომადგენლები დღეს უმაღლესი საბჭოს სხდომას არ დასწრებიან. მათ ახალგაზრდა აქტივისტებთან ერთად მერიის შენობაზე სტიკერები გააკრეს – “მონა”. ამ შინაარსის შეძახილები ისმოდა შესასვლელთან, ვიდრე საბჭოს სხდომა დასრულდებოდა.
უმაღლესი საბჭოს წევრები მერიის შენობაში სხვა შესასვლელიდან შევიდნენ. სხდომის დატოვების შემდეგაც აქციის მონაწილეებთან მხოლოდ დავით ბაციკაძე გამოჩნდა, უმაღლესი საბჭოს წევრი “ქართული ოცნებიდან”. მას მედიასთან კომენტარის გაკეთების საშუალება აქციის მონაწილეებმა არ მისცეს ხმაურიანი შეძახილების გამო.
“ჟურნალისტები უფრო მეტი ხართ, ვიდრე აქციის მონაწილეები…” – მოასწრო დეპუტატმა ეთქვა, ვიდრე ის მერიის შენობას დატოვებდა.
აქციის მონაწილეები ახლა უმაღლესი საბჭოს თავმჯდომარის, დავით გაბაიძის გამოჩენას ელიან.
უმაღლესი საბჭო ბათუმის საკრებულოს სხდომათა დარბაზში მართავს სხდომებს, ვიდრე უწყება ახალ შენობაში სხდომათა დარბაზს მოაწყობს.
