საზღვაო ტრანსპორტის სააგენტოს ინფორმაციით, ავსტრალიამ 2020 წლის 8 იანვრიდან აღიარა საქართველოს მიერ გაცემულ მეზღვაურთა სერტიფიკატები. „ავსტრალიისგან მეზღვაურთა სერტიფიკატების ურთიერთაღიარების ხელმოწერილი მემორანდუმი მივიღეთ“, – წერია სააგენტოს მიერ გავრცელებულ ინფორმაციაში.
„დღეის მდგომარეობით ასეთი მემორანდუმი გაფორმებული გვაქვს მსოფლიოს 52 სახელმწიფოსთან“, – უთხრა „ბათუმელებს“ სააგენტოს დირექტორის მოადგილემ.
რას ნიშნავს ეს მეზღვაურებისთვის, რომლებიც საქართველოს საზღვაო სასწავლებლების მიერ გაცემული სერტიფიკატებს ფლობენ? – სააგენტოს დირექტორის მოადგილის, ივანე აბაშიძის თქმით, ქართველ მეზღვაურებს ახლა უკვე უფლება ექნებათ დასაქმდნენ ავსტრალიის დროშის ქვეშ მცურავ გემებზეც.
„ავსტრალია გამოირჩევა ძალიან მაღალი სტანდარტებით და შერჩევის მკაცრი კრიტერიუმებით, როგორც გაცემული საბუთების, ისე მეზღვაურთა კომპეტენციის ნაწილში. შესაბამისად, ჩვენი მეზღვაურები თავისუფლად შეძლებენ დასაქმდნენ ავსტრალიის დროშის ქვეშ მცურავ გემებზე – მათ საკმაოდ მსხვილი სანაპირო სანაოსნო ინდუსტრია აქვთ“, – აცხადებს ივანე აბაშიძე.
ივანე აბაშიძე ამბობს, რომ გერმანიის აღიარების მემორანდუმმა, რომელიც გასულ წელს გაფორმდა, „დიდი ეფექტი იქონია სხვა ქვეყნების დარწმუნებაზე, რომ ჩვენთან საკმაოდ მაღალი სტანდარტებია. ახლა მოლაპარაკებები მიმდინარეობს გაერთიანებულ სამეფოსთან და 2020 წელში დიდი ბრიტანეთის ბაზარიც გაიხსნება… პარალელურად ვმუშაობთ ნორვეგიასთან, შვედეთთან და ჰოლანდიასთან“.
საზღვაო ტრანსპორტის სააგენტოს დირექტორის მოადგილის აზრით, „ახლა ბურთი უკვე დამსაქმებლებისა და მეზღვაურების მოედანზეა“ და ის კარგად უნდა გამოიყენონ.
რაც შეეხება ანალოგიური მემორანდუმებს, ის საქართველოს უკვე გაფორმებული აქვს ევროკავშირის წევრ 19 სახელმწიფოსთან და ივანე აბაშიძის თქმით, „დღეის მდგომარეობით მსოფლიოში რა გემებიც დაცურავს, დაახლოებით იმათ 80 %-ს ვფარავთ ჩვენი მეზღვაურების დასაქმების ბაზრის მიხედვით“:
„ევროკომისია 2019 წლიდან გვაღიარებს ერთ-ერთ ყველაზე წარმატებულ საზღვაო სახელმწიფოდ, რომელიც მეზღვაურებს აწვდის ევროპელ გემფლობელებს და გასულ წლის მონაცემებით მე-13 ადგილზე ვართ ევროპელი გემფლობელებისთვის ქართველი მეზღვაურების დასაქმების თვალსაზრისით“.
