„არა, პარტიიდან საერთოდ შორს ვართ… მე ბიძაჩემი დამეხმარა, მამაჩემი, მეც მქონდა რაღაც დაგროვებული. მინდოდა, რომ ჩემი სტუდენტები სხვა სტუდენტებისგან განსხვავებით არ დარჩენილიყვნენ, ყველა მიდიოდა და ჩვენც წავედით,“ – გვითხრა ბათუმის საზღვაო აკადემიის სტუდენტური თვითმმართველობის თავმჯდომარე შოთა კაკაშვილმა. ის ერთ-ერთია იმ სტუდენტებს შორის, რომელიც „ქართული ოცნების“ მიერ ორგანიზებულ კონცერტს გუშინ, 2 ნოემბერს დაესწრო. სტუდენტი ამბობს, რომ ბათუმიდან 120 სტუდენტის გამგზავრება ასევე კვება თვითონ დააფინანსა „ახლობლების და მეგობრების დახმარებით“.
სტუდენტები რეგიონებიდან თბილისში გუშინ „ქართული ოცნების“ ორგანიზებული ღონისძიების დასასწრებად წავიდნენ. „ქართული ოცნების“ ფეისბუქგვერდის ინფორმაციით, კვირეული გაიხსნა კონცერტით, რომლითაც ევროსაბჭოს თავმჯდომარედ საქართველოს არჩევა აღინიშნება. სტუდენტებს ღონისძიებაზე დასასწრებად შეტყობინებები სტუდენტური თვითმმართველობების თავმჯდომარეებმა გაუგზავნეს, სადაც საერთოდ არ იყო ნახსენები „ქართული ოცნება“ და პარტიის მიერ ორგანიზებული ღონისძიება. „მოსაწვევში“ ეწერა, რომ დაფინანსდებოდა მგზავრობა და კვება, ასევე: „თვითმმართველობა მოაგვარებს არებს“.
პარტია „ქართულ ოცნებაში“ არ უპასუხეს „ბათუმელების“ კითხვას, რამდენი დახარჯა „ქართულმა ოცნებამ“ სტუდენტების შესაკრებად. სტუდენტები, რომლებიც კონცერტს თბილისში დაესწრნენ, მედიასთან კომუნიკაციას თავი არიდებენ. ბსუ-ს სხვა სტუდენტებმა კი, რომლებიც კონცერტზე არ წასულან, გვითხრეს, რომ სტუდენტებს პარტიის ამ ღონისძიებაში ჩარევის შესახებ ინფორმაცია არ ჰქონდათ.
„ბათუმელებთან“ ბათუმის საზღვაო აკადემიის სტუდენტური თვითმმართველობის თავმჯდომარე, შოთა კაკაშვილი ირწმუნება, რომ პარტიას არაფერი დაუფინანსებია. ის 120 სტუდენტის თბილისში გამგზავრებას უწევდა კოორდინაციას. შოთა ამბობს, რომ საზღვაო აკადემიის სტუდენტი 100 იყო და ინფორმაცია არ აქვს, რამდენი სტუდენტი წავიდა თბილისში, მაგალითად, ბათუმის სახელმწიფო უნივერსიტეტიდან.
„დანარჩენი 20 ახალგაზრდა ისე წავიყვანეთ, ვინც ქალაქიდან სურვილი გამოთქვა,“ – დასძენს შოთა.
შოთა კაკაშვილის ინფორმაციით, რეგიონებიდან ჩასული სტუდენტები საპროტესტო აქციებზე არ მისულან და არც პოლიტიკური განაცხადი გაუკეთებია მათთან ვინმეს.
„ჩვენ ჩავედით „მარშუტკებით“, კონცერტი იწყებოდა რვა საათზე, ჩავედით 7-ზე, მოგვილოცეს ევროსაბჭოს თავმჯდომარეობა და წავიდა ბენდის კონცერტი, ძალიან ციოდა, მაგრამ მუსიკაზე გავერთეთ და წამოვედით უკან…“ – ამბობს შოთა კაკაშვილი.
რატომ არ ეწერა სტუდენტებისთვის გაგზავნილ შეტყობინებაში ის, რომ მგზავრობას თვითმმართველობის თავმჯდომარე საკუთარი ჯიბიდან აფინანსებდა? თუ ეს ასეა, რა დაუჯდა შოთა კაკაშვილს 100 სტუდენტის ბათუმიდან თბილისში ჩაყვანა და მათი დაპურება?
„შევკრიბავ და მერე გეტყვით, 5 – 6 „მარშუტკა“ იყო… სტუდენტებს როცა შეტყობინება გავუგზავნე, უკვე ყველაფერი გარკვეული იყო. მანამდე ადმინისტრაციას ვთხოვეთ დაფინანსება და უარი გვითხრეს,“ – გვიპასუხა შოთა კაკაშვილმა.
საზღვაო აკადემიის სტუდენტური თვითმმართველობის თავმჯდომარე ამბობს, რომ ევროსაბჭოს თავმჯდომარეობის აღსანიშნავად მოწყობილი ღონისძიების შესახებ ინფორმაცია სხვა უნივერსიტეტების თვითმმართველობების თავმჯდომარეებისგან გაიგო, იდეა მოეწონა და კონცერტზე დასასწრებად სხვა სტუდენტების წაყვანის სურვილიც გაუჩნდა.
თუკი სტუდენტებს საქართველოს ევროსაბჭოს თავმჯდომარეობის აღნიშვნა სურდათ, რატომ მიიჩნიეს საჭიროდ პარტიულ აქტივობაში ჩართვა, თანაც საკუთარი დაფინანსებით? – ესეც ვკითხეთ სტუდენტური თვითმმართველობის ხელმძღვანელს.
„მნიშვნელოვანი იყო სტუდენტების ურთიერთობა. გზაშიც ხშირად ვაჩერებდით ტრანსპორტს და ერთმანეთთან კომუნიკაცია გვქონდა…. მე აკადემიას უკვე ვამთავრებ და ზღვაში ვაპირებ წასვლას. როგორ ფიქრობთ, რა კავშირი უნდა მქონდეს პოლიტიკასთან?“ – კითხულობს სტუდენტი.
„ბათუმელების“ სატელეფონო ზარებს არ უპასუხა ბათუმის სახელმწიფო უნივერსიტეტის თვითმმართველობის თავმჯდომარე დავით ზოიძემ.
ამ თემაზე:
https://netgazeti.ge/news/411113/
