ბათუმის სასწრაფო-სამედიცინო დახმარების ცენტრმა „ტოიოტას“ ფირმის 4 მაღალი გამავლობის მანქანა შეიძინა. ტრანსპორტის საერთო ღირებულება 574 ათასი ლარია.
აჭარის ჯანდაცვის სამინისტროს ინფორმაციით, ბათუმის გადაუდებელი სასწრაფო სამედიცინო დახმარების ცენტრის ახალი ავტომობილების შეძენა გამოძახებების რიცხვის გაზრდას უკავშირდება.
„განსაკუთრებული პრობლემები ამ მხრივ ბათუმზე შემოერთებულ ტერიტორიებზე, განსაკუთრებით კი ხელვაჩაურის მუნიციპალიტეტში გვქონდა, სადაც ზოგიერთ დასახლებებში ჩვეულებრივი მანქანებით მისვლა განსაკუთრებით ზამთრის უამინდობის დროს ჭირდა”, – ამბობს ჯანდაცვის მინისტრი ზაალ მიქელაძე.
მათივე ინფორმაციით, ამ დროისთვის ბათუმის მოსახლეობას თანამედროვე აპარატურით აღჭურვილი 13 ბრიგადა ემსახურება.
სამინისტროს ინფორმაციით, ბრიგადებს წელიწადში 2-ჯერ – ზამთრისა და ზაფხულის სეზონზე ამატებენ, გამოძახებების რიცხვის გაზრდასთან დაკავშირებით.
