ეკონომიკური თანამშრომლობისა და განვითარების ორგანიზაცია (OECD) 2019 წლის მიმოხილვას აქვეყნებს განათლებაში შეფასებისა და ატესტაციის სისტემების შესახებ.
მიმოხილვაში საუბარია, სოფლად და ქალაქად მცხოვრები მოსწავლეების აკადემიურ მიღწევებს შორის საგრძნობ განსხვავებაზე.
„სოფლად მცხოვრები მოსწავლეები 44 ქულით ჩამორჩებიან თავიანთ თანატოლებს ქალაქებში, რაც დაახლოებით, სკოლაში სწავლის 1,5 წელს უთანაბრდება“, – ნათქვამია მიმოხილვაში.
ეს განსხვავება რეგიონულ დონეზე იკვეთება – თბილისში მოსწავლეთა თითქმის 2/3 საბუნებისმეტყველო მეცნიერებებში (PISA-ს შკალაზე) საბაზისო მაჩვენებელს სცდება, ხოლო რეგიონებში, ამ დონეზე მოსწავლეთა მხოლოდ 1/3-ია.
აკადემიური მიღწევების მხრივ, კიდევ უფრო მძიმე ვითარებაა არაქართულენოვანი მოსწავლეების შემთხვევაში. „ის მოსწავლეები, რომლებიც შინ ქართულად ლაპარაკობენ, უსწრებენ თავიანთ თანატოლებს, რომელთა მშობლიური ენა ქართული არ არის. სამწუხაროდ, სწავლის ხარისხში ეს უთანასწორობა 2009-2015 წლებში კიდევ უფრო გაიზარდა“, – ნათქვამია მიმოხილვაში.
ამავე მიმოხილვაში ვკითხულობთ, რომ ქართულენოვანმა მოსწავლეებმა საბუნებისმეტყველო მეცნიერებებში 419 ქულა მიიღეს, ხოლო იმ მოსწავლეებმა, რომლებიც შინ ქართულად არ ლაპარაკობენ – 359 ქულა.
„მიუხედავად იმისა, რომ ქვეყნის მოსწავლეთა თითქმის ნახევარი საბაზისო ნიშნულს ვერ გასცდა, ეს ზღვარი ეთნიკურად აზერბაიჯანელ მოსწავლეთა თითქმის 90%-მა ვერ გადალახა. 3-ე დონეს კი ეთნიკურად აზერბაიჯანელმა ვერც ერთმა მოსწავლემ ვერ მიაღწია“.
ეკონომიკური თანამშრომლობისა და განვითარების ორგანიზაცია, საერთაშორისო ეკონომიკური ორგანიზაციაა, რომელიც მუშაობს უკეთესი პოლიტიკის შემუშავებაზე, რომელიც ხელს შეუწყობს კეთილდღეობას, თანასწორობას და შესაძლებლობას ყველასთვის.
ამავე თემაზე:
რა უჯდებათ მინისტრებსა და მათ მოადგილეებს შვილების კერძო სკოლაში სწავლა
