„მანდარინის საშუალო ფასი 60 თეთრია, თუმცა ეს დამოკიდებულია ხარისხზე,“ – ამბობს აჭარის სოფლის მეურნეობის მინისტრი ტიტე აროშიძე. მისი თქმით, ქობულეთისა და ხელვაჩაურის მუნიციპალიტეტებში უკვე მოქმედებს ციტრუსის გადამამუშავებელი 25 საწარმო.
„დაახლოებით 1000 ტონამდე უკვე გატანილია ექსპორტზე… ძირითადად, გაიტანეს რუსეთში, უკრაინაში, სომხეთში და ასევე ლატვიაში. მიმდინარეობს მოლაპარაკება ბელორუსთან და შუა აზიის ქვეყნებთან. ისინი ითხოვენ გარკვეულ სტანდარტს. როცა ეს დეტალები დაზუსტდება, ჩვენ მაშინვე გავავრცელებთ ინფორმაციას ექსპორტიორებში“, – ამბობს ტიტე აროშიძე.
მას ასევე ვკითხეთ, გავა თუ არა მანდარინი წელს ევროკავშირის ქვეყნებში. მინისტრის თქმით, ამ ეტაპზე ხელშეკრულებები ექსპორტიორებსა და რომელიმე ევროპულ კომპანიას შორის გაფორმებული არ არის, თუმცა მოლაპარაკებები მიმდინარეობს.
გასული წლის მსგავსად, მინისტრი წელსაც იმეორებს, რომ „ევროპის ბაზარზე დიდი კონკურენციაა“.
„კონკურენცია არის საკმაოდ მაღალი. იქ არის ესპანეთის და იტალიის ბაზრები, იქედან უფრო მარტივია გასვლა ევროპის ბაზრებზე, ასევე ლიდერობს ჩინეთი, მას შეუძლია მოამარაგოს ყველა ქვეყანა. ჩვენ გვინდა შევიდეთ კონკურენციაში, მაგრამ, ძირითადად, ტრადიციულ ბაზრებზე ვართ ორიენტირებული,“ – გვითხრა ტიტე აროშიძემ.
მეციტრუსეები წინა წლების მსგავსად წელსაც მიიღებენ სახელმწიფოსგან სუბსიდიას – 10 თეთრს თითო კილოგრამ არასტანდარტულ მანდარინში.
აჭარის სოფლის მეურნეობის სამინისტროს ინფორმაციით, წელს რეგიონში დაახლოებით 55 ათასი ტონა ციტრუსის მოსავალი გვაქვს [გასულ წელს იყო 65 ათასი ტონა]. მანდარინის კრეფის სეზონი უკვე მიმდინარეობს.
