ნეტგაზეთი • RU

ასობით კოალა დაიღუპა ხანძრის შედეგად – ავსტრალიაში ფაქტს ტრაგედია უწოდეს

ასობით კოალა დაიღუპა ტყეში გაჩენილი ხანძრის შედეგად ავსტრალიაში, ოქტომბრის ბოლოს.

ცეცხლი 2 000 ჰექტარ ბუჩქნარზე გავრცელდა, ახალ სამხრეთ უელსში, სიდნეიდან 250 მილის დაშორებით. ბოლო თვეების განმავლობაში ახალ სამხრეთ უელსში ასობით ტყის ხანძრის კერაა დაფიქსირებული.

ხანძრის შედეგად სავარაუდოდ დაიღუპა 350 კოალა, რომლებიც ამ არეალში ცხოვრობდნენ. ცხოველების მაშველებმა ხანძრისას კოალების ნაწილის გადარჩენა შეძლეს. გადარჩენილი ცხოველები სპეციალურ საავადმყოფოში არიან გადაყვანილი, სადაც მათ მკურნალობენ.

ამ ვიდეოში ჩანს, როგორ ცდილობს ქალი კოალა ხანძრისგან გადაარჩინოს.

მაშველების თქმით, კოალების დაღუპვა განსაკუთრებით ტრაგიკული ფაქტია, რადგან იმ ტერიტორიაზე, სადაც ხანძარია, სხვადასხვა სახეობის კოალა ბინადრობს.  უკანასკნელ ათწლეულში კი ადგილობრივი სახეობის კოალების რაოდენობა მნიშვნელოვნად შემცირდა.

მონიტორინგის ჯგუფები ამბობენ, რომ ავსტრალიაში კოალების რაოდენობა მცირდება და ველურ ბუნებაში სულ 43 000 ეგზემპლარი დარჩა. კოალების რაოდენობის შემცირება იხსნება მათი საცხოვრებელი არეალის შემცირებით, კლიმატის ცვლილებებით, ავადმყოფობითა და ძაღლების თავდასხმით.

სამხრეთ უელსის ბუნების დაცვის მრჩეველთა საბჭოს წევრის, ჯეიმს ტრიმენის თქმით, ჩვეულებრივზე თბილი ამინდი, რაც კლიმატის ცვლილებითაა გამოწვეული, კოალების ბუნებრივ საცხოვრებელ არეალს ემუქრება, არა მხოლოდ ხანძრებით, არამედ ფოთლოვან მცენარეებზე გავლენით, რითაც კოალები იკვებებიან.

„თუ კოალების შემცირება ამ ტემპით გაგრძელდება 20-30 წლის განმავლობაში, კოალა შესაძლოა შუა ასწლეულში საერთოდ გაქრეს ველური ბუნებიდან“ – განაცხადა მან.

_____________________

წყარო: bbc, euronews

ფოტო: smh.com.au

 

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com