ჯანდაცვის მინისტრი: დაშავებულ მუშას ფეხი შეუნარჩუნდება


„დაშავებულს ფეხი შეუნარჩუნდება,“ – ამბობს აჭარის ჯანდაცვის მინისტრი, ზაალ მიქელაძე აბუსერიძის ქუჩაზე დაშავებული მუშების შესახებ. წყალანირების სისტემის სარეაბილიტაციო სამუშაოების დროს, დღეს, 17 ნოემბერს, რკინის კონსტრუქციის დაცემის შედეგად ორი მუშა დაშავდა. სასწრაფო-სამედიცინო სამსახურის ინფორმაციით, ერთ-ერთ მუშას ფეხი მოტეხილი ჰქონდა.

„ორივე დაშავებულს ახლა ოპერაციას უკეთებენ. 40 წლამდე მამაკაცს ორივე წვივის ძვალი აქვს მოტეხილი, მას რეფერალურ ჰოსპიტალში უტარებენ ოპერაციას. მეორე დაშავებული BAU-შია მოთავსებული, მას ბარძაყის ძვლის მოტეხილობა ჰქონდა. ის დაახლოებით 30 წლისაა,“ – გვითხრა აჭარის ჯანდაცვის მინისტრმა, ზაალ მიქელაძემ.

წყალანირების სისტემის სარეაბილიტაციო სამუშაოებს ბათუმის მერიის დაკვეთით კომპანია „გზა“ ასრულებდა. ბათუმის ვიცე-მერმა, ჯაბა ტუღუშმა გვითხრა, რომ ჯერ გარკვეული არ არის, რის გამო დაშავდნენ მუშები. მისი თქმით, მშენებლობაზე უსაფრთხოების ნორმები დაცული იყო.

ნეტგაზეთის მასალების სხვა გამოცემებში გადაბეჭდვის წესი
ავტორი