ბათუმში სამი სამარშრუტო ხაზის მძღოლები გაიფიცნენ – რას პასუხობს მერია მათ 


ბათუმში, ფიროსმანის ქუჩაზე მოძრავი მიკროავტობუსების მძღოლები ამ მარშრუტზე #29 მიკროავტობუსების მოძრაობას აპროტესტებენ. ამჟამად ამ მარშრუტზე მოძრავი 31-ე, 24-ე და 21-ე სამარშრუტო მიკროავტობუსის მძღოლები არიან გაფიცულები.

მძღოლების თქმით, 29 ნომრით მოძრავი მიკროავტობუსი მათ მგზავრებს აკლებს.

ფიროსმანის ქუჩაზე მოძრავი მიკროავტობუსის მძღოლები გაიფიცნენ, ისინი ამ ქუჩაზე 29-ე მიკროავტობუსის მოძრაობას აპროტესტებენ

ბათუმის მერიის საქალაქო ტრანსპორტის განყოფილების უფროსი ემზარ ქავჟარაძე „ბათუმელებთან“ ამბობს, რომ მძღოლებს უფლება არ აქვთ, რომელიმე მიკროავტობუსის მოძრაობის აკრძალვა მოითხოვონ ამ მარშრუტზე, რადგან კონკურსში მონაწილეობის დროს, მათ ჰქონდათ ინფორმაცია ამის შესახებ.

„ჩვენ არ ვაპირებთ მძღოლებთან საუბარს, დაველაპარაკებით იმ კომპანიების წარმომადგენლებს, რომლებმაც მიიღეს მერიის მიერ გამოცხადებულ კონკურსში მონაწილეობა და ვისთანაც გაფორმდა ხელშეკრულება. ხელშეკრულებაში უწერიათ, რომ გაფიცვის ან სხვა შემთხვევაში, სამი დღით ადრე უნდა აცნობონ მერიას, რომ მოსახლეობა მომსახურების გარეშე არ დარჩეს.

წინააღმდეგ შემთხვევაში, კომპანია დაჯარიმდება. განმეორების შემთხვევაში, გაუუქმდებათ ხელშეკრულება და გამოცხადდება ახალი კონკურსი,“ – ამბობს  ემზარ ქავჟარაძე.

მისი თქმით, ამ დროისთვის გაფიცული არიან შპს „აჭარტრანსრეგულირების“, შპს „ჯორჯიან ტრანსის“  და შპს „ავტოტრანსის“ მიკროავტობუსები.

ფიროსმანის ქუჩაზე მიკროავტობუსები არ მოძრაობენ

29 ნომერი მიკროავტობუსი თამარის დასახლებიდან მოძრაობს გორგასლის ქუჩის მიმართულებით, შემდეგ გადადის ფიროსმანის ქუჩაზე და მიდის ბავშვთა საავადმყოფოს მიმართულებით.

„მძღოლებს წერილობით მივცემთ გაფრთხილებას, პირველ ეტაპზე არ დავაჯარიმებთ, მაგრამ განმეორების შემთხვევაში, შევუწყვეტს ხელშეკრულებას და ხელმეორედ გამოვაცხადებთ კონკურსს.

ეს არის საკრებულოს მიერ დამტკიცებული ხაზები, რომლებიც ზაფხულში დამტკიცდა, შემდეგ, აგვისტოს თვეში, ამ ხაზებზე გამოცხადდა კონკურსი და თუ რაიმე პრობლემა ჰქონდათ, მაშინ კონკურსში არ უნდა მიეღოთ მონაწილეობა კომპანიებს,“ – ამბობს ემზარ ქავჟარაძე.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com