განათლების კოალიციისა და ილიას სახელმწიფო უნივერსიტეტის ინიციატივით გამოცხადდა სკოლის ლიდერობის ეროვნული კონკურსი, რომლის მიზანიც საჯარო სკოლის პრესტიჟისა და ავტორიტეტის გაზრდის მხარდაჭერაა. ასევე, წარმატებული დირექტორების გამოვლენა და მათი გაცნობა საზოგადოებისთვის.
განათლების კოალიციის ინფორმაციით, სკოლის ლიდერობის ეროვნული კონკურსი ასევე ხელს შეუწყობს სკოლის მართვის პრაქტიკის განვითარებას და სწავლა-სწავლების შედეგების გაუმჯობესებას სკოლებში.
კონკურსანტების რეგისტრაცია დღეს, 29 ოქტომბერს, დაიწყო და 16 იანვრის ჩათვლით გაგრძელდება.
კოალიციის განცხადებით, კონკურსანტებს 17 წევრისგან დაკომპლექტებული საბჭო სამ ეტაპად შეარჩევს. განათლების კოალიციის ცნობით, საბჭოში შედიან განათლებისა და მართვის სპეციალისტები, პედაგოგები და მედიის წარმომადგენლები.
კონკურსის პირველ ეტაპზე აპლიკაციებს ტექნიკურად შეამოწმებენ, მეორე ეტაპისთვის გამოვლინდება ფინალისტები, ხოლო მესამე ეტაპზე, 2020 წლის 25 მაისს გამოვლინდება სამი გამარჯვებული – გრანპრის და სპეციალური პრიზის მფლობელები.
გრანპრის მფლობელ დირექტორს პრიზის სახით გადაეცემა 5 000 ლარი, ხოლო სკოლას სპეც-პროექტის განსახორციელებლად – 30 000 ლარი.
სპეციალური პრიზის მფლობელ დირექტორებს კი პრიზის სახით გადაეცემათ 2000-2000 ლარი.
სკოლების მხარდაჭერის ერთიანი ფონდი კი 25 000 ლარია. სკოლების შორის თანხის გადანაწილებაზე გადაწყვეტილებას იღებს საკონკურსო საბჭო.
სკოლის ლიდერობის ეროვნულ კონკურსში მონაწილეობის მსურველი დირექტორების რეგისტრაცია შესაძლებელია ვებგვერდზე – www.efageorgia.ge
