20 პედაგოგს, რომლებმაც მასწავლებლის მომზადების 60-კრედიტიანი პროგრამა გაიარეს, შესაძლოა კრედიტები არ ჩაუთვალონ. პედაგოგებმა მასწავლებელთა პროფესიული განვითარების ეროვნულ ცენტრს განცხადებით უკვე მიმართეს.
„ბათუმელები“ ორ პედაგოგს ესაუბრა, რომლებმაც აღნიშნული პროგრამა ხიჭაურში, საპატრიარქოს ტბელ აბუსერიძის სახელობის სასწავლო უნივერსიტეტში გაიარეს. თუმცა, როგორც აღმოჩნდა, პედაგოგების უმეტესობას მასწავლებლის კომპეტენციის დამადასტურებელ გამოცდაზე 10 ქულაზე ნაკლები ჰქონდა მიღებული.
60-კრედიტიანი მასწავლებლის პროგრამის გავლა მხოლოდ იმ პრაქტიკოს ან მასწავლებლობის მაძიებელ პირებს შეუძლიათ, რომლებმაც საგნობრივი კომპეტენციის დამადასტურებელ გამოცდაზე, მინიმუმ 10 ქულაზე მეტი დააგროვეს.
„აღმოჩნდა, რომ ვინც ეს პროგრამა გავიარეთ, მხოლოდ სამ ადამიანს ჰქონდა საგნობრივ გამოცდაზე 10 ქულა აღებული, სხვებს ათზე ნაკლები“, – გვითხრა ერთ-ერთმა პედაგოგმა, რომელსაც ამ ეტაპზე არ სურს საკუთარი ვინაობის გასაჯაროება.
„ბათუმელები“ კიდევ ერთ პრაქტიკოს პედაგოგს ესაუბრა, რომელიც ხულოს მუნიციპალიტეტის ერთ-ერთ საჯარო სკოლაში მუშაობს და ის ხვალ, 26 ნოემბერს, დაგეგმილ მასწავლებლის საგნობრივი კომპეტენციის დამადასტურებელ გამოცდაზე გასვლას პირველად გეგმავს.
ჰქონდათ თუ არა პროგრამის გავლის უფლება იმ ადამიანებს, რომლებმაც გამოცდაზე ვერ შეძლეს ათზე მეტის ქულის დაგროვება? როგორც მასწავლებლის პროფესიული განვითარების ეროვნულ ცენტრში გვითხრეს, ამის შესახებ მათთვის იმ უნივერსიტეტს უნდა მიეწოდებინა ინფორმაცია, სადაც ემზადებოდნენ.
„ბათუმელები“ ხიჭაურის სასწავლო უნივერსიტეტსაც დაუკავშირდა. აქ გვითხრეს, რომ პრობლემა მხოლოდ რამდენიმე პირს შეექმნა. „ყველას არ ჰქონდა პრობლემა, 1 ან 2 ქულა ვისაც ჰქონდა, მათთვის იყო პრობლემა, თუმცა გვარდება“, – გვითხრეს აქ.
„ბათუმელების“ ინფორმაციით, ამ დროისთვის ხიჭაურის სასწავლო უნივერსიტეტში პედაგოგის მომზადების 60-კრედიტიან პროგრამაზე 16 პირი სწავლობს, 20-მა კი უკვე დაასრულა სწავლა.
უღიარებს თუ არა სამინისტრო კრედიტებს იმ პირებს, რომლებმაც საგნობრივი კომპეტენციის დამადასტურებელ გამოცდაზე ვერ დააგროვეს ათი ქულა, მაგრამ გაიარეს 60-კრედიტიანი მასწავლებლის მომზადების პროგრამა, ამის შესახებ საბოლოო პასუხს მასწავლებლის სახლი მათ ნოემბერში გასცემს.
