„აღარ მოგვიკრეფია, მყიდველი არ ჩანს,“ – გეტყვიან ქობულეთის სოფლებში, სადაც წელს ხურმის განსაკუთრებით დიდი მოსავალი მოვიდა. ფერმერების თქმით, წინა წლებისგან განსხვავებით, წელს ხურმის შესყიდვით არავინ დაინტერესებულა და ხილი ხეზე ლპება.
მოსავალი რომ დიდია, ამას ადასტურებენ აჭარის სოფლის მეურნეობის სამინისტროშიც. საპროგნოზო 2700 ტონიდან ექსპორტზე ამ დროისთვის გატანილი დაახლოებით მხოლოდ 200 ტონაა, თუმცა სამინისტროში ირწმუნებიან, რომ ხილი არ ლპება და ექსპორტიორები სოფლებში მალე გამოჩნდებიან.
აჭარის სოფლის მეურნეობის სამინისტროში დაგვიდასტურეს ხურმის ექსპორტიორების პრობლემაც – ფუმიგაციის წესით დამუშავებული ხის ყუთები, რომლითაც ხურმა უნდა გაიტანონ.
„ეს მოთხოვნა გაჩნდა ახლა, აქამდე არ ითხოვდა იმავეს უკრაინა… ორი დღის წინ ხელვაჩაურში ამოქმედდა ფუმიგაციის სამსახური, სადაც ერთ დღეში 700 კუბური მეტრი ხის მასალის თერმულად დამუშავებაა შესაძლებელი. ხურმა ჯერ მწიფე არ არის. ახლა იწყება ხურმის კრეფის სეზონი. შესაძლოა, ფერმერებთან არ მისულა არავინ, მაგრამ სოფლის რწმუნებულებს აქვთ დეტალური ინფორმაცია, მიაკითხონ და მიიღებენ ინფორმაციას,“ – გვითხრა ლევან ბოლქვაძემ, აჭარის სოფლის მეურნეობის სამინისტროს აგრარული განვითარების დეპარტამენტის უფროსმა.
ლევან ბოლქვაძემ ვერ გვითხრა, ხურმის რა რაოდენობის ექსპორტირების რესურსი არსებობს, ან რომელ ქვეყნებში გაიტანენ ხურმას საქართველოდან. მისი თქმით, 18 ოქტომბერს დაახლოებით 800 ტონა ხურმას წაიღებენ უკრაინასა და რუსეთში.
რაც შეეხება ხურმის საშუალო ფასს, იგი გასული წლების მსგავსად, ისევ 60 თეთრია.
„ფასს ჩვენ არ ვარეგულირებთ, ამაზე ფერმერს უნდა შეუთანხმდნენ,“ – დასძინა ლევან ბოლქვაძემ „ბათუმელებთან“.
