გაქვთ ბათუმისთვის იდეა? – მაშინ ეს კონკურსი თქვენთვისაა


თუ გაქვთ იდეა, რომლის განხორციელებაც, თქვენი აზრით, ბათუმში შეიძლება, 2019 წლის 30 ოქტომბრამდე შეგიძლიათ კონკურსში მიიღოთ მონაწილეობა და იდეის განსახორციელებლად საჭირო თანხაც მოიპოვოთ.

საუბარია კონკურსზე შენი იდეა ბათუმს, რომელიც მოქალაქეებს შესაძლებლობას აძლევს,  განკარგონ ბათუმის მერიის ბიუჯეტიდან გამოყოფილი თანხები.

კონკურსში მონაწილეობა რამდენიმე პირობითაა შესაძლებელი:

  1. კონკურსში მონაწილე პირი სრულწლოვანი და ბათუმში რეგისტრირებული უნდა იყოს, შესაძლებელია იდეა წარადგინოს საინიციატივო ჯგუფმაც. თითოეულ მოქალაქეს ან მოქალაქეთა საინიციატივო ჯგუფს შეუძლია მხოლოდ ერთი საპროექტო განაცხადის დარეგისტრირება
  2. პროექტი უნდა ხორციელდებოდეს ბათუმში და უნდა განეკუთვნებოდეს თვითმმართველობის კომპეტენციას
  3. პროექტი მიზნად უნდა ისახავდეს საზოგადოებრივი სიკეთის შექმნას
  4. პროექტი უნდა წარმოადგენდეს საზოგადოებრივ საკუთრებას და არ იწვევდეს მოვლა-პატრონობის მნიშვნელოვან დამატებით ხარჯებს

რეგისტრირებული პროექტები ჯამში უნდა ექცეოდეს 500 000 ლარის ფარგლებში.

გამარჯვებული პროექტები ხმის მიცემით გამოვლინდება, მინიმალური ხმის რაოდენობა ბათუმში რეგისტრირებული მოსახლეობის 0,5 პროცენტია, დაახლოებით 700 ხმა.

რეგისტრაცია შესაძლებელია ონლაინ, ვებგვერდის –  idea.batumi.ge-ს მეშვეობით. ამ შემთხვევაში საჭიროა ელექტრონული ხელმოწერის ქონა. არსებობს მეორე გზაც, იდეის რეგისტრირების მსურველი ბათუმის მერიაში ან მერიის 14-დან ერთ-ერთ სერვისცენტრში უნდა მივიდეს და თან იქონიოს პირადობის მოწმობა.

მერიის ცნობით, რეგისტრაციის შედეგად მოქალაქეს ენიჭება მომხმარებლის სახელი და პაროლი, რომლითაც შესაძლებელი ხდება ონლაინპლატფორმაზე www.idea.batumi.ge -ზე ავტორიზაციის გავლა, იდეის დარეგისტრირება ან/და რჩეული იდეისთვის ხმის მიცემა.

2020 წლის იდეების დაფინანსებისთვის განსაზღვრული ბიუჯეტი 500 000 ლარს შეადგენს.

კონკურსის პირველ ეტაპზე ბათუმის მერია ახორციელებს მოქალაქეთა ან/და მოქალაქეთა საინიციატივო ჯგუფების მიერ მოწოდებული საპროექტო განაცხადების პირველად ანალიზს. განაცხადები, რომლებიც აკმაყოფილებს დადგენილ მოთხოვნებს და განაცხადით გათვალისწინებული საქმიანობა განხორციელებადია მომდევნო წლის განმავლობაში, მიზანშეწონილობის შეფასების მიზნით, გადაეცემა მერის მრჩეველთა საბჭოს. სწორედ მრჩეველთა საბჭო გამოავლენს საუკეთესო განაცხადებს საჯარო ხმის მიცემის პროცედურაში მონაწილეობის მისაღებად, მაქსიმუმ 10 პროექტს, რის შემდეგაც იწყება იდეებისთვის ხმის მიცემის პროცედურა.

2020 წლის იდეებისთვის ხმის მიცემა დაიწყება 2019 წლის 11 ნოემბერს და დასრულდება 2019 წლის 1-ელ დეკემბერს. სწორედ მოქალაქეები წყვეტენ, საბოლოოდ რომელი იდეები უნდა განხორციელდეს. 10 დეკემბრამდე კი გამარჯვებული პროექტები გამოქვეყნდება, სულ სამი პროექტი, რომლებიც ყველაზე მეტ ხმას დააგროვებენ.

პროექტის „შენი იდეა ბათუმს“ ახორციელებს ქალაქ ბათუმის მერია და ბათუმის მუნიციპალური სერვისების სააგენტო. მხარდამჭერები – ამერიკის შეერთებული შტატების საერთაშორისო სააგენტოს (USAID), დემოკრატიული მმართველობის ინიციატივა (GGI) , პური მსოფლიოს (Bread for the World) და სამოქალაქო საზოგადოების ინსტიტუტი.

ამავე თემაზე: 

პროექტში „შენი იდეა ბათუმს“ გამარჯვებული 3 იდეა წლის ბოლომდე განხორციელდება

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.