მოქალაქე ლაშა ჯანიბეგაშვილი პარლამენტის წინააღმდეგ საკონსტიტუციო სასამართლოში დავობს. დავის საგანი ის სამართლებრივი ნორმაა, რომლის მიხედვითაც ადვოკატისთვის სავალდებულოა ადვოკატთა ასოციაციის წევრობა. განმწესრიგებელ სხდომაზე საკონსტიტუციო სასამართლოს პირველმა კოლეგიამ უნდა გადაწყვიტოს, დაიწყება თუ არა საქმეზე არსებითი განხილვა.
მოსარჩელე მიიჩნევს, რომ გასაჩივრებული ნორმები პირს, რომელსაც სურს საადვოკატო საქმიანობა, საკუთარი ნების საწინააღმდეგოდ, იძულებულს ხდის გაწევრიანდეს საქართველოს ადვოკატთა ასოციაციაში, რადგან სხვაგვარად ვერ განახორციელებს პროფესიულ საქმიანობას. მოსარჩელის პოზიციით, ეს სამართლებრივი რეგულაცია ეწინააღმდეგება საქართველოს კონსტიტუციით გარანტირებულ გაერთიანების თავისუფლებას, მეწარმეობის თავისუფლებასა და სამართლიანი სასამართლოს უფლებას.
„დაუშვებელია რომელიმე პროფესიული ორგანიზაციის წევრობა აიძულო ადამიანს, თავს მოახვიო საკუთარი მართლმსაჯულება, გამოუქვეყნო გადაწყვეტილებები შერჩევითი სამართლის საფუძვლით მიღებული და ახდევინო ყოველწლიური საწევრო და მოახდინო პროფესიის სრულიად მონოპოლიზება. ეს „სამართლიანი სახელმწიფოსა“ და „სამართლიანი სასამართლოს“ პრინციპებს ღიად არღვევს და ძირს უთხრის ადამიანების თავისუფლებას და ადვოკატის დამოუკიდებლობას,“ – აღნიშნულია საკონსტიტუციო სარჩელში.
