წამებში გადარჩენილი სიცოცხლე – აორტის დისექციის ოპერაციები საერთაშორისო ჰოსპიტალ „ბაუში“


„გილოცავთ, ოპერაციამ წარმატებით ჩაიარა და თქვენი მეუღლე გადარჩა“ – ამ სიტყვებს ნინო დოლიძე 9-საათიანი ოპერაციის განმავლობაში ელოდა კართან, რომლის მიღმაც მის მეუღლეს აორტის დისექციის (განშრევების) ურთულეს ოპერაციას უკეთებდნენ. პაციენტი ახლა თავს კარგად გრძნობს და კლინიკიდან მალე გაეწერება კიდეც.

„ჩემს მეუღლეს არაფერი სტკიოდა, არც კი ვიცოდით, რომ გულის კედლები ფურცელივით ჰქონდა გათხელებული, ეს პირველად საავადმყოფოში გვითხრეს დიაგნოსტიკის შემდეგ, როცა მწვავე კრიზისითა და ტკივილებით მოვედით სასწრაფოდ კლინიკა ,,ბაუში“. ჩემს მამამთილსაც იგივე პრობლემა ჰქონდა – აორტის განშრევება, უსიმპტომოდ, ერთ დღეს კი აორტის გათხელებული კედელი გასკდა და ის ადგილზე, სახლში გარდაიცვალა. ჩემს მეუღლეს გაუმართლა – სასწრაფოდ მოვედით საავადმყოფოში, კრიზისისთანავე და ოპერაცია დროულად გაკეთდა. ჩემი ქმრის გულის ყოველი წერტილი აწყობილია. მადლობა ამ პროფესიონალიზმისთვის ქირურგს, მახირ ბალაქიშიევს, რადიოლოგს, ექოსკოპისტს, მთელ გუნდს, ვისი ძალისხმევითაც წამებში გადაწყდა სიცოცხლის საკითხი. შინ ახლა ჩვენი წლინახევრის პატარა გველოდება, რომელიც 23 წლის ლოდინის შემდეგ გაგვიჩნდა“, – ამბობს პაციენტის მეუღლე.

ნინო დოლიძე, პაციენტის მეუღლე, რომელსაც კლინიკა ,,ბაუში” აორტის დისექციის ურთულესი ოპერაცია გაუკეთდა სექტემბრის თვეში ბათუმის კლინიკა „ბაუში“ აორტის დისექციის 3 წარმატებული ოპერაცია გაკეთდა. ,,ბაუ“ ერთადერთი კლინიკაა აჭარაში, სადაც ნებისმიერ დროს შესაძლებელია აორტის დისექციით პაციენტს  ჩაუტარდეს სასწრაფო და გადაუდებელი ოპერაცია. სახელმწიფო სხვა კარდიოქირურგიული ოპერაციების მსგავსად ამ ოპერაციებსაც 70%-ით აფინანსებს.

აორტის დისექცია სიკვდილიანობის მაღალი მაჩვენებლის გამო მსოფლიო მასშტაბის პრობლემადაა მიჩნეული, აორტის განშრევების ოპერაცია კი ერთ-ერთი ურთულესია თანამედროვე კარდიოქირურგიაში.

კლინიკა ,,ბაუში” აორტის დისექციის ოპერაციას კარდიოქირურგი მახირ ბალაქიშიევი აკეთებს

აორტა მთავარი სისხლძარღვია და მთელ სხეულს აწვდის სისხლს. განშრევებისას აორტის შიდა შრეზე ჩნდება ნახეთქი, სისხლი შრეებს შორის ჟონავს და შედეგად სასიცოცხლო ორგანოებში ირღვევა სისხლის მიმოქცევა. პაციენტის გადარჩენა ამ დროს მხოლოდ დროული და პროფესიონალური ჩარევითაა შესაძლებელი.

გულსისხლძარღვთა დაავადებები და აორტის განშრევებაც ძირითადად 40-დან 60 წლამდე მამაკაცებში გვხვდება. ამ დაავადებისას ჯერ კიდევ 10-15 წლის წინ სიკვდილიანობა ქირურგიული ჩარევის შემთხვევაშიც კი 20 – 40% იყო. ბოლო ხუთი წლის მონაცემებით კი ეს მაჩვენებელი 5-10%- მდე შემცირდა.

ჩაურევლობის შემთხვევაში მიიჩნევა, რომ პირველი 48 საათის განმავლობაში ყოველი საათი თითო პროცენტით ამცირებს პაციენტის გადარჩენის შანსს.

  • აორტის დისექცია უმეტესად ღამით, მოულოდნელად იჩენს თავს
  • ასხამს ცივი ოფლი, რასაც ხშირად მოჰყვება კოლაფსის ნიშნები
  • თუ აღმავალი აორტა განშრევდა, წესისამებრ ამას აორტის სარქველის რეგურგიტაცია მოჰყვება
  • სისხლის დიდი ნაწილი გადის აორტის შრეებს შორის და კოლტებად ლაგდება.
  • მოცირკულირე სისხლის რაოდენობა მცირდება, წნევა დაბლა იწევს და ყალიბდება ტიპური კოლაფსის და კარდიოგენური შოკის სურათი.
  • ხშირად გულის პერანგში იმდენი სისხლი გროვდება, რომ ვითარდება გულის ტამპონადა

სწორედ ამიტომ არის  აორტის განშრევება ძალიან საშიში დაავადება და მისი განვითარების შემთხვევაში წუთებიც კი გადამწყვეტია. აორტის განშრევება ძირითადად ვითარდება მძიმე ტვირთის აწევის ან ჰიპერტენზიული კრიზის – წნევის მომატების დროს.

კარგი სპეციალისტებისა და თანამედროვე აპარატურის წყალობით აორტის განშრევების დიაგნოსტირება და გამოვლენა დღეს რთული აღარ არის. მთავარია, ექიმმა დროულად მიიტანოს ეჭვი პრობლემაზე.

სამწუხაროდ, დამახასიათებელი ტკივილის გამო აორტის განშრევება ხშირად ერევათ მწვავე კორონარულ სინდრომში (სტენოკარდია, მიოკარდიუმის ინფარქტი).

თუ ექიმმა დროულად იეჭვა განშრევება, პირველად გულის ულტრაბგერითი გამოკვლევის ჩატარებაა საჭირო. კვალიფიციურ ექოსკოპისტს კარგი აპარატის საშუალებით უმრავლეს შემთხვევაში აორტის განშრევების დიაგნოზის დასმა არ უჭირს.

,,ბაუ“ ერთადერთი კლინიკაა აჭარაში, სადაც ნებისმიერ დროს, 24/7 შესაძლებელია აორტის დისექციით პაციენტს ჩაუტარდეს სასწრაფო და გადაუდებელი ოპერაცია

ნეტგაზეთის მასალების სხვა გამოცემებში გადაბეჭდვის წესი
ავტორი