სასკოლო წიგნები მნიშვნელოვნად გაძვირდა


კერძო სკოლის მოსწავლის ერთ-ერთი მშობელი ამბობს, რომ მეოთხე კლასის სახელმძღვანელოების შეძენა წელს 161 ლარი დაუჯდა, მაშინ როცა გასულ წელს წიგნებში 80 ლარი გადაიხადა. 161 ლარად მშობელმა 7 სახელმძღვანელო შეიძინა, მოსწავლის რვეულთან ერთად. გამოდის, რომ ამ მშობელმა ერთ წიგნში, საშუალოდ, 23 ლარი გადაიხადა.

ერთ-ერთი მშობელი „ფეისბუქით“ გამოგვეხმაურა, რომელიც ამბობს, რომ სასკოლო წიგნების შესაძენად 150 ლარი გადაიხადა.

საჯარო სკოლების მოსწავლეებს სასკოლო სახელმძღვანელოებით სახელმწიფო უზრუნველყოფს, კერძო სკოლების მოსწავლეებს კი, სახელმძღვანელოების შეძენა საკუთარი ხარჯებით უწევთ.

როგორც საქართველოს განათლების სამინისტროში გვითხრეს, 2019 წელს სახელმწიფოს ერთი ერთეული წიგნის დაბეჭდვა 4.19 ლარი დაუჯდა, სამუშაო რვეულის კი – 2.65 ლარი.

2018 წელს კი, მათი განცხადებით, წიგნის ბეჭდვის საშუალო ერთეულის ღირებულება შეადგენდა 2.83 ლარს, ხოლო რვეულის – 2.45 ლარს.

სამინისტროს ინფორმაციით, ფასის ზრდა ლარის კურსის დაცემამ გამოიწვია.

„ის წიგნი, რომელიც სახელმწიფოს გამომცემლობამ დაუბეჭდა, ვთქვათ, 1.12 თეთრში,  შეუძლია სხვას 5 ლარად მიჰყიდოს. ეს საბაზრო ეკონომიკაა და ამას ვერავის დაუშლის, რადგან ქაღალდი, საღებავი, ლითონის ფირფიტები, რომლებზეც ხდება ტექსტების აკრეფა, ყველაფერი უცხოეთიდან შემოდის,“ – გვითხრეს  საგანმანათლებლო და სამეცნიერო ინფრასტრუქტურის განვითარების სააგენტოში.

ამ დროისთვის ლარის კურსი დოლართან მიმართებაში 2.9624-ია. გასულ წელს კი, ამ პერიოდში, ლარის ოფიციალური გაცვლითი კურსი დოლართან მიმართებაში 2.61 იყო.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com