„სახელმწიფო უკვე ზღვარგადასული მეთოდებით ებრძვის ჩემს ოჯახს,“ – წერს სოციალურ ქსელ „ფეისბუქში“ დეკანოზ გიორგი მამალაძის ძმა, თორნიკე მამალაძე. მისი თქმით, დღეს, 11 სექტემბერს, მესაზღვრეებმა სარფის გამსვლელ პუნქტზე მისი ოჯახის წევრებს თავისუფლად გადაადგილების უფლება შეუზღუდეს.
„დღეს მამაოს მეუღლე და ჩემი მეუღლე სარფში თურქეთის მხარეს გადადიოდნენ იმისთვის, რომ ბავშვებისთვის სასკოლოდ რაღაცები ეყიდათ იაფად. გაურკვეველი მიზეზით ქართველმა მესაზღვრეებმა საზღვარზე არ გადაუშვეს. ეს უკვე არის მთელი ჩვენი ოჯახის დევნა ძალოვანი სტრუქტურების მხრიდან. ამით მაინც ვერ დაგვაშინებთ და მოვითხოვ ოფიციალურად პასუხს ამაზე,“ – წერს თორნიკე მამალაძე.
შინაგან საქმეთა სამინისტროს პრესცენტრის ინფორმაციით, კონკრეტული პირის საზღვის კვეთა პერსონალური ინფორმაციაა, თუმცა უწყებამ ამ შემთხვევის შესახებ შესაძლოა განმარტება მოგვიანებით გააკეთოს.
2019 წლის 30 აგვისტოს თორნიკე მამალაძემ ასევე „ფეისბუქში“ დაწერა, რომ ერთ-ერთი ეპისკოპოსი მას მოკვლით დაემუქრა. დეკანოზ გიორგი მამალაძეს თბილისის საქალაქო სასამართლომ 9-წლიანი პატიმრობა 2017 წლის 5 სექტემბერს მიუსაჯა. მას გამოძიება პატრიარქ ილია მეორის მდივან-რეფერენტის მკვლელობის მცდელობას ედავებოდა.
ვრცლად ამ თემაზე იხილეთ აქ
