უმაღლესი საბჭო მაჟორიტარული საარჩევნო სისტემის გაუქმების განხილვას იწყებს 


მომავალი არჩევნების პროპორციული წესით ჩატარებასა და მაჟორიტარული სისტემის გაუქმების შესახებ საკითხი აჭარის უმაღლეს საბჭოში 5 ან 6 სექტემბერს დარეგისტრირდება. ეს კი იმას ნიშნავს, რომ დეპუტატები შესაბამისი საკონსტიტუციო ცვლილების ინიციატივას უფრო აქტიურ რეჟიმში განიხილავენ და მხოლოდ კომენტარებით აღარ შემოიფარგლებიან.

რაც შეეხება ცვლილების მიმართ უმრავლესობის მზაობას, პრესსამსახურის ინფორმაციით, ამ საკითხზე უმაღლესი საბჭოს თავმჯდომარეს, დავით გაბაიძეს უკვე დაფიქსირებული აქვს ნება, რომ საბჭო ამ ცვლილებისთვის მზადაა და ამასთან დაკავშირებით ოპოზიციასთან კონსულტაციებიც გაიმართა.

აჭარის უმაღლეს საბჭოში 21 წევრია და მათგან 6 მაჟორიტარია. თუ აჭარის კონსტიტუციაში შევა ცვლილება და მაჟორიტარული სისტემა გაუქმდება, მაშინ უმაღლესი საბჭოს დეპუტატებს, როგორც საქართველოს პარლამენტის შემთხვევაში, პროპორციული წესით აირჩევენ.

აჭარის უმაღლესი საბჭოს არჩევის პროპორციულ სისტემაზე გადასვლის საკითხი დღის წესრიგში მას შემდეგ დადგა, როცა  „ქართულ ოცნებაში“ მიიღეს გადაწყვეტილება 2020 წლის საპარლამენტო არჩევნების პროპორციული წესით ჩატარების შესახებ. ეს საქართველოში რუსი დეპუტატის გავრილოვის საქართველოს პარლამენტში ვიზიტის შემდეგ საპროტესტო აქციის მონაწილეებმა ერთ-ერთ მოთხოვნად დააყენეს.

პროპორციულ სისტემაზე გადასვლა არჩევნებში მხოლოდ პოლიტიკური პარტიების მონაწილეობას გულისხმობს. პროპორციული წესით არჩევნებისას ამომრჩეველი მხოლოდ ერთ ბიულეტენს იღებს, ირჩევს პარტიას და აღარ ირჩევს კონკრეტულ პირებს [ მაჟორიტარებს] მაჟორიტარული უბნების მიხედვით.

პროპორციული სისტემის მოქმედებისას საარჩევნო ოლქი მრავალმანდატიანია და პარტიებს შორის მანდატები ნაწილდება ოლქში მათ მიერ მიღებული ხმების პროპორციულად.

ნეტგაზეთის მასალების სხვა გამოცემებში გადაბეჭდვის წესი
ავტორი