აქციის მონაწილეებმა ჭავჭავაძის ქუჩის გადაკეტვა რამდენიმე წუთით მოახერხეს. სიტუაცია ბათუმის საქალაქო სასამართლოსთან მას შემდეგ დაიძაბა, რაც ბადრაგმა 4 ბრალდებული სასამართლო შენობიდან გამოიყვანა. დაკავებულების ახლობლები სწორედ მათ პატიმრობას აპროტესტებენ დღეს დილიდან სასამართლოსთან და მათ უკანონო პატიმრებს უწოდებენ.
პოლიციელები ცდილობდნენ ბრალდებულების ახლობლებისთვის ჭავჭავაძის ქუჩის გადაკეტვის საშუალება არ მიეცათ, მაგრამ აქციის მონაწილე კაცებთან საუბრის დროს ქალებმა ქუჩის გადაკეტვა რამდენიმე წუთით მაინც მოახერხეს.
პოლიცია ნებისმიერ ასეთ შემთხვევაზე მყისიერად რეაგირებს, მაგრამ ახლა უკვე ცალკეული ქალები გადიან ბათუმის ყველაზე დატვირთულ ქუჩაზე და ცდილობენ ტრანსპორტის მოძრაობა ამ გზით შეაფერხონ.
აქციის მონაწილეები მსვლელობის დროს სკანდირებენ: „თავისუფლება უდანაშაულო ბიჭებს!“
საქმე იმაშია, რომ 2 მარტს „რესპუბლიკური საავადმყოფოს“ ეზოში სიტყვიერი და ფიზიკური დაპირისპირების დროს ორი ადამიანი დაჭრეს, ხუთს კი სხვადასხვა სახის დაზიანება მიაყენეს. 3 მარტს შინაგან საქმეთა სამინისტრომ ამ ფაქტზე 5 პირი დააკავა. მათ გამოძიება “ჯგუფურ ხულიგნობას წინასწარი შეთანხმებით” ედავება.
პროკურატურის მოთხოვნის საფუძველზე ერთ-ერთი პირი, რომელსაც, პოლიციის ვერსიით, ცეცხლსასროლი იარაღი ჰქონდა, გირაოთი გაათავისუფლეს. მეორე ბრალდებული, რომელმაც დანით დაჭრა ადამიანები, პოლიციამ ვერ დააკავა. შესაბამისად, პატიმრობაში მხოლოდ ის პირები რჩებიან, რომლებმაც „ხელით იჩხუბეს“.