ნეტგაზეთი • RU

„ოცნების ქალაქის“ მაცხოვრებლები არჩილ ხაბაძის განცხადებას აპროტესტებენ

 

დღეს, 14 ნოემბერს ე.წ „ოცნების ქალაქის“  მაცხოვრებლებმა საპროტესტო აქცია გამართეს.  მათი განცხადებით, აჭარის მთავრობის თავმჯდომარემ არჩილ ხაბაძემ  საზოგადოებრივი მაუწყებლის გადაცემაში „გამომძიებელი რეპორტიორი“  განაცხადა რომ თუ „ოცნების ქალაქის“ მაცხოვრებლები ხელისუფლების შეთავაზებას არ მიიღებდნენ, მათ ძალისმიერი მეთოდებით  დაატოვებინებენ  ტერიტორიას.  საპროტესტო აქციაში დაახლოებით  300 ადამიანი მონაწილეობდა. 

 

საპროტესტო აქცია „ოცნების ქალაქში“

 

„ბათუმელები“ აქციის ერთ-ერთ მონაწილეს როინ გუნდაძეს ესაუბრა.

 

„არჩილ ხაბაძემ ამ გადაცემაში განაცხადა, რომ ისინი საცხოვრებელ ფართს მხოლოდ მარტოხელა დედებს და უსახლკარო ოჯახებს შესთავაზებენ. ჩვენ მოვითხოვთ რომ ხელისუფლებამ დაამატოს კატეგორიები და საცხოვრებელი ფართი მრავალშვილიანი და გასაყოფი ოჯახებისთვისაც გამოყოს. ასევე, მოვითხოვთ რომ საცხოვრებელი ფართი გამოეყოს აფხაზეთის ომის მონაწილე ვეტერანებს და შშმ პირებს“.

 

როინ გუნდაძე ამბობს, რომ „ოცნების ქალაქის“ მაცხოვრებლები  არჩილ ხაბაძესთან შეხვედრას მოითხოვენ:

 

„გვინდა რომ მოვიდეს და ნახოს რა პირობებში ცხოვრობთ ოჯახები. ასევე განგვიმარტოს, რა იგულისხმა ძალისმიერ მეთოდებში“.

 

როინ გუნდაძის თქმით, იმ შემთხვევაში თუ ხელისუფლება მათ მოთხოვნებს არ დააკმაყოფილებს, ისინი საპროტესტო აქციები მთავრობის სახლის წინ გადაინაცვლებს.

 

 

აქციის მონაწილეები

 

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე