ნეტგაზეთი • RU

აჭარაში გრიპის საწინააღმდეგო ვაქცინაცია იწყება

 

აჭარის ჯანდაცვის სამინისტროს ინფორმაციით, სახელმწიფო პროგრამის ფარგლებში აჭარაში შემოტანილია 1551 დოზა გრიპის საწინააღმდეგო ვაქცინა.


ვაქცინა სახელმწიფოს ხარჯზე ჩაუტარდებათ მაღალი რისკის ჯგუფებს. 

 

რისკ-ჯგუფებად განისაზღვრა შემდეგი კატეგორიის ადამიანები:

 

• ქრონიკული დაავადების მქონე პირთაგან: 18 წლამდე ასაკის დიაბეტით დაავადებული, დიალიზზე მყოფი მოქალაქეები;

• ბავშვთა სახლების, მოხუცთა თავშესაფრების ბინადარნი და მათი მომსახურე პერსონალი;

• სასწრაფოს, მიმღები განყოფილებების, რეანიმაციის, გადაუდებელი სამედიცინო დახმარების, დიალიზის განყოფილებებისა და საზოგადოებრივი ჯანმრთელობის ცენტრების მომსახურე პერსონალი.

 

ვაქცინაციის დაგეგმილი პერიოდია მიმდინარე წლის ნოემბერი.

 

ჯანდაცვის სამინისტრო გრიპის პრევენციის მიზნით მოსახლეობას თავის რეკომენდაციებსაც უზიარებს. ეს რეკომენდაციებია:

 

• ხელების ჰიგიენა. ხველის/ცემინების წესების დაცვა;

• დაავადების სიმპტომების გამოვლენის შემთხვევაში (მაღალი ტემპერატურა, ხველა), საზოგადოებრივი თავშეყრის ადგილებზე მოხვედრისგან თავის არიდება;

• სათავსოების ხშირი განიავება;

• საერთო მოხმარების ზედაპირების სველი წესით დასუფთავება.

ექიმთან კონსულტაცია სავალდებულოა ისეთი სიმპტომების დროს, როგორიცაა:

• შეუპოვარი ან გახანგრძლივებული ცხელება;

• ტკივილი გულმკერდის არეში;

• ციანოზი (სილურჯე ცხვირტუჩის არეში);

• სუნთქვის გართულება.

 

გრიპის სეზონად მოიაზრება 2015 წლის მე-40 კალენდარული კვირიდან 2016 წლის 20-ე კალენდარული კვირის ჩათვლით პერიოდი.

ნეტგაზეთის მასალების სხვა გამოცემებში გადაბეჭდვის წესი
ბათუმელები