საქართველოს მთავრობის და საერთაშორისო და ადგილობრივი ორგანიზაციების თანამშრომლობის შედეგად, საქართველოში 50-მდე დიდი ზომის ბავშვთა სახლი დაიხურა. მთავრობის ინფორმაციით, რეფორმის ფარგლებში, ზრუნვის ალტერნატიული მომსახურება 5 000-მდე ბავშვს მიეწოდა, რომელთა ნაწილი დაბრუნდა საკუთარ ოჯახში, ნაწილი განთავსდა მინდობით აღზრდაში (რეგულარული, ნათესური ან სპეციალიზებული მინდობითი აღზრდა) ან მცირე საოჯახო ტიპის სახლებში.
„საქართველოში კვლავ მნიშვნელოვან გამოწვევად რჩება შშმ ბავშვებისთვის განკუთვნილი კოჯრის ბავშვთა სახლი და თბილისის ჩვილ ბავშვთა სახლი, სადაც ცხოვრობს მძიმე და ღრმა შეზღუდული შესაძლებლობის და განვითარების შეფერხების მქონე 78 ბავშვი. ჩვილ ბავშვთა სახლში იმყოფება 0-7 წლის ასაკის 54 ბავშვი, ხოლო კოჯრის ბავშვთა სახლში 6-18 წლის ასაკის – 24 ბავშვი.
შშმ ბავშვების კეთილდღეობის, მათი ინტერესების დაცვისა და ბავშვზე ზრუნვის სისტემის სრული რეფორმის უზრუნველყოფის მიზნით, მნიშვნელოვანია ალტერნატიული მომსახურების განვითარება და ოჯახის მხარდამჭერი სერვისების გაფართოება შეზღუდული შესაძლებლობის მქონე ბავშვებისთვის. აშშ-ს საერთაშორისო განვითარების სააგენტოსა და გაეროს ბავშვთა ფონდთან თანამშრომლობით იწყება შშმ ჩვილების და ბავშვებისთვის მცირე ზომის ალტერნატიული მომსახურების განვითარება და მათი სოციალური ინკლუზიის ხელშეწყობა. ამ მიზნით, გაეროს ბავშვთა ფონდი მართავს შეხვედრებს ადგილობრივ მთვარობებთან,“ – ნათქვამია აჭარის მთავრობის განცხადებაში.
არჩილ ხაბაძესთან შეხვედრას გაეროს ბავშვთა ფონდის ბავშვთა დაცვის პროგრამების ხელმძღვანელი, პიერ ფერრი და გაეროს ბავშვთა ფონდის ბავშვთა დაცვისა და სოციალური კეთილდღეობის სპეციალისტი ჯაბა ნაჭყებია ესწრებოდნენ.
