მოსამართლე გიორგი გრატიაშვილი დახურულ სხდომაზე განიხილავს გაუპატიურების საქმეს. ბათუმის საქალაქო სასამართლოში წინასასამართლო სხდომის დახურვა, დღეს, 23 ივლისს, პროკურორმა თორნიკე გოგიშვილმა იმ მოტივით მოითხოვა, რომ საქმე პირად ცხოვრებას ეხება. პროკურორის შუამდგომლობას ბრალდებულის სამივე ადვოკატი და თავად ბრალდებულიც დაეთანხმა.
ამ საქმეში დაზარალებულად ცნობილმა ქალმა პოლიციელებს უთხრა, რომ ის ბრალდებულმა ირაკლი თ.-მ გააუპატიურა. პოლიციაში მეზობელმა დარეკა იმ საცხოვრებელი კორპუსიდან, სადაც დაზარალებული ქალი და ბრალდებული ნაქირავებ ბინაში ერთად ცხოვრობდნენ. მეზობლის ჩვენების მიხედვით, მან ბინიდან ქალის კივილის ხმა გაიგონა.
გამოძიება ამ დრომდე ელოდება ექსპერტიზის დასკვნას.
ადვოკატების თქმით, მომხდარს ბრალდებული უარყოფს. იგი 32 წლისაა. ადვოკატების ვერსიით, დაზარალებულად ცნობილი გოგო ბათუმში ირაკლი თ.- სთან დაოჯახების მიზნით ჩამოვიდა და შურისძიება მას შემდეგ გადაწყვიტა, როცა ირაკლიმ მას მშობლები არ გააცნო.
ადვოკატის, ნონა დუმბაძის თქმით, არ არსებობს საქმეში არც ერთი მტკიცებულება, რაც გაუპატიურების ფაქტს დაადასტურებს. ადვოკატი აქცენტს აკეთებს დაზარალებულად ცნობილი ქალის მაგისტრ მოსამართლისთვის უკვე მიცემულ ჩვენებაზე, სადაც იგი, პოლიციის განყოფილებაში მიცემული თავდაპირველი ჩვენებისგან განსხვავებით, გაუპატიურებას ან რაიმე სახის ფიზიკურ ძალადობას გამორიცხავს.
დაზარალებული რუსეთის მოქალაქეა. მან წინასწარ მისცა სასამართლოს ჩვენება, რადგან შესაძლოა რუსეთში დაბრუნდეს.
დღევანდელ პროცესზე უნდა გაირკვეს, რამდენად დასაშვებია ის მტკიცებულებები, რაც მხარეებმა სასამართლოს წარუდგინეს. მოსამართლე ასევე გადაწყვეტს, საქმეზე არსებითი განხილვა დაიწყება თუ არა.
ბრალის დადასტურების შემთხვევაში, ირაკლი თ.-ს 6-დან 8 წლამდე თავისუფლების აღკვეთა ელის. ის ამჟამად წინასწარ პატიმრობაში იმყოფება.
