განათლების სამინისტროს ინფორმაციით, ამოქმედდა სამთვიანი პროგრამა, რომლის ფარგლებშიც ეთნიკური უმცირესობებით დასახლებულ მუნიციპალიტეტებში – დმანისში, მარნეულსა და საგარეჯოში, სასულიერო პირებს ქართულ ენას შეასწავლიან.
პროგრამას ზურაბ ჟვანიას სახელობის სახელმწიფო ადმინისტრირების სკოლა ახორციელებს.
როგორც პროექტის მენეჯერი მარიკა ციბაძე „ბათუმელებთან“ ამბობს, ამ დროისთვის პროგრამაში 50-მდე პირია დარეგისტრირებული. „ბევრმა გამოთქვა სურვილი, ამიტომ ოქტომბერში კიდევ დაემატებიან ბენეფიციარები“, – გვეუბნება ციბაძე.
მისი თქმით, პროგრამა რელიგიის სახელმწიფო სააგენტოსთან მემორანდუმის ფარგლებში ხორციელდება. პროგრამა სახელმწიფო ბიუჯეტიდან ფინანსდება, თუმცა ჟვანიას სახელობის სახელმწიფო ადმინისტრირების სკოლაში არ გვითხრეს, ამ მიზნის მისაღწევად რა თანხა დაიხარჯება.
სსიპ-ის პიარმენეჯერმა ლიკა ბაბლუანმა „ბათუმელებს“ განუცხადა, რომ უნდა გაარკვიოს, არის თუ არა საჯარო ინფორმაცია პროგრამისთვის გამოყოფილი თანხა, ეს მაშინ, როცა სსიპ-ი და პროგრამაც სახელმწიფო ბიუჯეტიდან ფინანსდება. მოგვიანებით კი დასძინა, რომ ამ ციფრის გასაგებად, ინფორმაცია უნდა გამოვითხოვოთ და „მას კანონით დადგენილ, ათდღიან ვადაში მოგვაწვდის“.
მთავარი ფოტო: განათლების სამინისტრო/რელიგიური უმცირესობების სასულიერო პირები სახელმწიფო ენის შესწავლის სამთვიან კურსს გაივლიან.
