საპირფარეშოს მილების კაუსტიკური სოდით გაწმენდისას ქალმა მე-3 ხარისხის დამწვრობა მიიღო


სიმონ ხეჩინაშვილის სახელობის თბილისის საუნივერსიტეტო კლინიკის დამწვრობის ცენტრში რამდენიმე დღის წინ პაციენტი გადაიყვანეს, რომელმაც თავისივე სახლის აბაზანაში საკანალიზაციო მილების გაწმენდა სცადა კაუსტიკური სოდის გამოყენებით, შედეგად კი მეორე და მესამე ხარისხის დამწვრობა მიიღო.

„უნიტაზში ჩაყარა ეს კაუსტიკური სოდა, რომელიც რეაქციაში შევიდა წყალთან და ამოიფრქვა. დამწვრობა სწორედ ამ  ამოფრქვეული სითხისგან მიიღო“, – გვითხრა დაზარალებული ქალის ახლობელმა.

დამწვრობის ცენტრის ხელმძღვანელის, გუგა ქაშიბაძის თქმით პაციენტის მდგომარეობა ამჯერად სტაბილურია. პაციენტს აღენიშნება სახის, გულმკერდის და ქვემო კიდურების ქიმიური დამწვრობა.

კაუსტიკური სოდა, იგივე სოდიუმის ჰიდროქსიდი არაორგანული ნაერთია და მისი საშუალებით მილების გაწმენდის ხერხს დიასახლისების ნაწილი მიზანშეწონილად მიიჩნევს სწორი დოზირების შემთხვევაში, თუმცა როგორც ბსუ-ს ასოცირებული პროფესორი, ქიმიკოსი ნინო კიკნაძე ამბობს, კაუსტიკური სოდა ტექნიკური და სამრეწველო მიზნებისთვის გამოიყენება და მისი საყოფაცხოვრებო დანიშნულებით გამოყენება სასტიკად დაუშვებელია.

„კაუსტიკური სოდა ქიმიურ რეაქციაში შედის წყალთან და ასეთი სოდის გამოყენება მილების გასაწმენდად დაუშვებელია, მითუფრო, როცა უამრავი გამწმენდი საშუალება არსებობს, რასაც ასევე სჭირდება ნიღბის, ხელთათმანების გამოყენება და დოზირება. კაუსტიკური სოდა შეიცავს ნატრიუმს, წყალთან რეაქციაში შესვლისას სწრაფად ქაფდება და ნატრიუმის ტუტე, იგივე მწვავე ტუტე წარმოიქმნება, რომელიც წვავს. ქიმიური ცდებისას მწვავე ტუტეებთან განსაკუთრებული სიფრთხილით ვიქცევით ქიმიურ ლაბორატორიებშიც კი“ – ამბობს ქიმიკოსი.

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან