ბათუმში, აჭარის მთავრობის მხარდაჭერით, კავკასიის უნივერსიტეტი ახალ კამპუსს და სკოლას ააშენებს. მშენებლობის პრეზენტაცია დღეს, 10 ივლისს, გაიმართა.
“კავკასიის უნივერსიტეტის ახალი კამპუსი სრულიად ჯდება საქართველოს მთავრობის მიერ ინიცირებულ განათლების ქალაქების კონცეფციაში, რომელიც გულისხმობს ერთ სივრცეში როგორც საგანმანათლებლო ინფრასტრუქტურის, ასევე თანამედროვე საბიბლიოთეკო, საკონფერენციო, საბუნებისმეტყველო და ტექნოლოგიური ლაბორატორიების არსებობას,” – განაცხადა საქართველოს განათლების მინისტრის მოადგილემ, ირინა აბულაძემ პრეზენტაციაზე.
კამპუსი აღჭურვილი იქნება თანამედროვე ინფრასტრუქტურით, ბიბლიოთეკით, ლაბორატორიებით, სპორტული მოედნებით, საცურაო აუზით და სტუდენტური საერთო საცხოვრებლით. ახალი შენობა 1500 სტუდენტსა და 500 მოსწავლეზეა გათვლილი. უნივერსიტეტში ისწავლიან როგორც საქართველოდან, ისე უცხოეთიდან ჩამოსული სტუდენტები.
აჭარის მთავრობის თავმჯდომარის, თორნიკე რიჟვაძის განცხადებით, კავკასიის უნივერსიტეტში ყოველწლიურად 10 ადგილობრივი სტუდენტი უფასოდ ისწავლის.
