სამინისტრო გოდერძის უღელტეხილზე 4136 კვ.მ მიწას 50-ნომრიანი სასტუმროს ასაშენებლად ყიდის


გოდერძის უღელტეხილზე მდებარე 4136 კვ.მ მიწის ნაკვეთს აჭარის ფინანსთა და ეკონომიკის სამინისტრო პირობებიან აუქციონზე 135 ათას ლარად ყიდის. ვაჭრობის ბიჯი 3 500 ლარია. პირობის მიხედვით, მომავალმა მესაკუთრემ ამ ადგილზე არანაკლებ 50-ნომრიანი სასტუმრო უნდა ააშენოს. გასაყიდი ნაკვეთი, რომელზეც 86.37კვ.მ ხის ნაგებობაც დგას, ხულოს მუნიციპალიტეტში, ბათუმი-ახალციხის მაგისტრალის გასწვრივ მდებარეობს. მაგისტრალის ამ ადგილიდან იწყება გოდერძის უღელტეხილი-ბეშუმის გზა, რომელიც გაივლის კურორტ გოდერძს.

სამინისტროს პირობების თანახმად, აუქციონში გამარჯვებულმა საპრივატიზებო საფასური ხელშეკრულების გაფორმებიდან ერთ თვეში უნდა გადაიხადოს. ხელშეკრულების გაფორმებიდან სამ თვეში კი, არქიტექტურული პროექტის მომზადებამდე, სამთო-სათხილამურო კურორტის ლანდშაფტის შესაბამისი საპროექტო ობიექტის ვიზუალური ესკიზი უნდა წარადგინოს სამინისტროში შესათანხმებლად.

ამასთან, გამარჯვებულმა უნდა უზრუნველყოს:

  • არაუგვიანეს 2020 წლის 31 მარტამდე არანაკლებ 50-ნომრიანი სასტუმროს შენობა-ნაგებობის მშენებლობის ნებართვის მიღება;
  • არაუგვიანეს 2020 წლის 31 დეკემბრამდე არანაკლებ 50-ნომრიანი სასტუმროს შენობა-ნაგებობის ნულოვანი ნიშნულის დასრულება;
  • არაუგვიანეს 2021 წლის 31 დეკემბრამდე არანაკლებ 50-ნომრიანი სასტუმროს შენობა-ნაგებობის ძირითადი მზიდი და არამზიდი კონსტრუქციის მშენებლობის დასრულება;
  • არაუგვიანეს 2022 წლის 1 ნოემბრამდე არანაკლებ 50-ნომრიანი სასტუმროს ექსპლუატაციაში შეყვანა და ამოქმედება;
  • სასტუმროს ამოქმედებიდან არანაკლებ 20 წლის განმავლობაში პროფილის შენარჩუნება, სადაც დასაქმებულთა 90% უნდა იყოს საქართველოს მოქალაქეები;

მიწის ნაკვეთის მომავალმა მესაკუთრემ აღნიშნულ პროექტში, არაუგვიანეს 40 თვის ვადაში, არანაკლებ 1 მილიონ 500 ათასი ლარის ინვესტიცია უნდა განახორციელოს.

ელექტრონული აუქციონი 2019 წლის 3 ივლისს დაიწყო და 18 ივლისს შეწყდება.

 

მთავარი ფოტო: გასაყიდი ნაკვეთი და შენობა გოდერძის უღელტეხილზე/ფოტო: აუქციონიდან
ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com