საქართველოს რკინიგზის განცხადებით, მატარებლებში სადგურების შესახებ ინფორმაციას რუსულ ენაზე უკვე ოთხი თვეა აღარ აცხადებენ. რკინიგზის განმარტებით, ამის მიზეზი მომსახურების ხარისხის გაუმჯობესებაა და არ უკავშირდება მიმდინარე პოლიტიკურ პროცესებს.
“საქართველოს რკინიგზა მუდმივად ზრუნავს მგზავრთა მაქსიმალურ კომფორტზე და ცდილობს დახვეწოს და განავითაროს სერვისები. შტადლერის ტიპის მატარებლებში მოახლოებული სადგურების შესახებ ინფორმაცია საინფორმაციო საშუალებებით ცხადდებოდა სამ ენაზე, რაც განცხადებების ხანგრძლივობის გამო მგზავრებში იწვევდა უკმაყოფილებას და დისკომფორტს.
შესაბამისად, თითქმის 4 თვეა სს “საქართველოს რკინიგზამ” მიიღო ტექსტის შემოკლებისა და გამოცხადების ინტენსივობის შემცირების გადაწყვეტილება. ვაცხადებთ, რომ ოთხი თვეა შტადლერის სამგზავრო მატარებლებში შემცირებული ტექსტი ნაკლები ინტენსივობით ცხადდება მხოლოდ ქართულ და საერთაშორისოდ აღიარებულ ინგლისურ ენებზე, მსოფლიოში აპრობირებული პრაქტიკის შესაბამისად.
სს “საქართველოს რკინიგზის” აღნიშნული გადაწყვეტილება გამოწვეულია მომსახურების ხარისხის გაუმჯობესებით და არ უკავშირდება მიმდინარე პოლიტიკურ პროცესებს,” – აღნიშნულია განცხადებაში.
