აჭარაში შესაძლოა მაჟორიტარული საარჩევნო სისტემა დატოვონ


პარლამენტისგან განსხვავებით აჭარის უმაღლეს საბჭოში შესაძლოა მაჟორიტარები ისევ აირჩიონ. უმაღლესი საბჭოში ამ საკითხზე ჯერ ოფიციალურად არ უმსჯელიათ, თუმცა, მაგალითად, იურიდიული კომიტეტის თავმჯდომარე, ნინო ჩხეტია „ბათუმელებთან“ ამბობს, რომ ის ადგილობრივ და რეგიონულ დონეზე მაჟორიტარული საარჩევნო სისტემის დატოვების მომხრეა.

„პირადად ჩემი მოსაზრებით, სრულებით დიდ აუცილებლობად არ ვთვლი, რომ რადგან პარლამენტის შემთხვევაში მიღებული იქნა ეს გადაწყვეტილება, გინდა თუ არა, მთელს საქართველოში საარჩევნო სისტემა იყოს აბსოლუტურად ერთნაირი. ჩვენ გვაქვს ადგილობრივი თვითმმართველობის დონეზე შერეული სისტემა. მგონია, რომ ადგილობრივ დონეზე და თუნდაც რეგიონულ  დონეზე, ეს უნდა შენარჩუნდეს… დიდი ნაწილი მაჟორიტარებისა კონკრეტული ოლქების წარმომადგენლები არიან,“ – გვითხრა ნინო ჩხეტიამ.

ამ ლოგიკით რატომ არ უნდა დარჩნენ მაჟორიტარები პარლამენტშიც?

„პარლამენტი განსხვავებულია. პარლამენტი ძირითადად მუშაობს საშინაო და საგარეო პოლიტიკის განსაზღვრაზე. შესაბამისად, პოლიტიკური ლიდერების აქტიური მონაწილეობა, რასაც განაპირობებს პროპორციული სისტემა, გამართლებულად მიმაჩნდა მაშინაც და ახლაც. ყველაზე მნიშვნელოვანი გადაწყვეტილება, რასაც იღებს საბჭო, არის ბიუჯეტი. შესაბამისად, მაჟორიტარების ვალდებულებითი ნაწილი იძლევა იმის საშუალებას, რომ ძალიან სამართლიანად იყოს გადაწყვეტილი რიგი საკითხები მუნიციპალიტეტების მიმართულებით,“ – ამბობს ნინო ჩხეტია, უმაღლესი საბჭოს იურიდიული კომიტეტის თავმჯდომარე.

უმაღლეს საბჭოს დღეს, 4 ივლისს შესაბამისი საკანონმდებლო ცვლილებებისკენ აჭარაში მოქმედმა რვა პარტიამ მოუწოდა. ბრიფინგზე ითქვა, რომ შესაძლოა ავტონომიაში საარჩევნო სისტემა „პოლიტიკური ვაჭრობის საგანი გახდეს“.

ბრიფინგს გამოეხმაურა დავით გაბაიძეც, უმაღლესი საბჭოს თავმჯდომარე. მან თქვა, რომ მსჯელობა უახლოეს დღეებში დაიწყება. „ცენტრში მიღებული გადაწყვეტილება ავტომატურად არ აისახება უმაღლეს საბჭოზე“, – ესეც დასძინა დავით გაბაიძემ და ისაუბრა იმაზეც, რომ თავისი პოზიციის გახმოვანება ამ ეტაპზე არ შეუძლია, ვიდრე კოლეგების მოსაზრებებს არ მოისმენს და გუნდის შიგნით არ მიიღებენ გადაწყვეტილებას.

„პარლამენტის შემთხვევაში ბარიერი არის ძალიან დაბალი, ფაქტობრივად 1% -ც არ არის და ჩვენ შემთხვევაში, როგორც უკვე გითხარით, ბუნებრივი ბარიერი 4.76%. ეს არის დეტალები, რომელზედაც ჩვენ უნდა ვიმსჯელოთ უპირველეს ყოვლისა უმაღლეს საბჭოში პოლიტიკურ სუბიექტებთან და, ბუნებრივია, ვინაიდან გაკეთდა განცხადება, ჩვენ ამასთან დაკავშირებით ვაპირებთ საუბარს. ეს დამოკიდებულია იმაზეც როგორ შევთანხმდებით დროში ჩვენ და ის კონკრეტული სუბიექტები. მე კიდევ ერთხელ ვიმეორებ, რომ პირადად მზად ვარ ვისაუბრო მათთან, როგორც ინდივიდუალურ რეჟიმში, ასევე ზოგადად“, – განაცხადა დავით გაბაიძემ.

საქართველოში პროპორციული წესით არჩევნების ჩატარებაზე 20 ივნისის მოვლენების შემდეგ ბიძინა ივანიშვილმა 24 ივნისს განაცხადა.

 

 

 

ნეტგაზეთის მასალების სხვა გამოცემებში გადაბეჭდვის წესი
ავტორი