8 პარტია აჭარაში პროპორციული არჩევნებისთვის აჭარის კონსტიტუციის შეცვლას ითხოვს


„აჭარის კონსტიტუციის“ შეცვლის მოთხოვნით დღეს, 4 ივლისს, 8 პოლიტიკურმა ძალამ დემოკრატიული ჩართულობის ცენტრში ბრიფინგი გამართა. ისინი დროულად კანონმდებლობის შეცვლას ითხოვენ იმისთვის, რომ აჭარის უმაღლესი საბჭოს არჩევნები 2020 წელს პროპორციული წესით ჩატარდეს.

„არსებული კონსტიტუციით აჭარაში პროპორციული სისტემით არჩევნები ვერ ჩატარდება… ჩვენ ვითხოვთ დროულად შეიცვალოს „აჭარის კონსტიტუცია“ და კონსტიტუციური კანონი“, – ამბობს გია მასალკინი, „შენების მოძრაობის“ ლიდერი აჭარაში.

საკანონმდებლო ცვლილებას ამ ეტაპზე აჭარაში ითხოვენ: „ნაციონალური მოძრაობა“, „ევროპული საქართველო“, „რესპუბლიკელები“, „შენების მოძრაობა“, ელისაშვილის „სამოქალაქო მოძრაობა“, „ემსახურე საქართველოს“, „გირჩი“, „ახალი საქართველო“.

პროპორციული წესით არჩევნების ჩატარებაზე 20 ივნისის მოვლენების შემდეგ ბიძინა ივანიშვილმა 24 ივნისს განაცხადა. მას შემდეგ აჭარის უმაღლესი საბჭოს ოფიციალური პოზიცია არ დაუფიქსირებია საარჩევნო სისტემის ცვლილებაზე.

„დავით გაბაიძე რომ დღემდე არ გამოხმაურებია ამ საკითხს, არ არის კარგი… არსებობს შიში, რომ ეს შესაძლოა გარკვეული სავაჭრო საგანი გახდეს თითქოს ავტონომიის სპეციფიკურობაზე ხაზგასმით“, – დასძენს გია მასალკინი.

დღეს მოქმედი კონსტიტუციით, აჭარის უმაღლეს საბჭოში სულ 21 დეპუტატია, აქედან 6 დეპუტატს მაჟორიტარული წესით ირჩევენ.

აჭარის უმაღლესი საბჭოს პროპორციულ არჩევნებში, ნულოვანი ბარიერის პირობებში, პოლიტიკურ პარტიას ერთი მანდატის [ადგილის] მოსაპოვებლად მინიმუმ 14 817 ხმა დასჭირდება, რაც საერთო ხმების 4,76 პროცენტია. ეს იმ შემთხვევაში, თუ აჭარის საარჩევნო ოლქებში ხმას მისცემს ყველა ის ამომრჩეველი, ვინც სიაშია რეგისტრირებული. 2018 წლის საპრეზიდენტო არჩევნების დროს კი, აჭარის ექვსივე საარჩევნო ოლქში ამომრჩეველთა საერთო რაოდენობა 311 149 იყო.

ამ თემაზე:

 რამდენი ხმა იქნება საჭირო უმაღლეს საბჭოში ერთი მანდატის მოსაპოვებლად – 0%-იანი ბარიერი

ნეტგაზეთის მასალების სხვა გამოცემებში გადაბეჭდვის წესი
ავტორი