„ამ ადგილზე რომ რაღაც უნდა აშენდეს, მე მივედი ამ პოზიციამდე ბევრი ფიქრის შემდეგ,“ – ეს ზაურ ახვლედიანმა, აჭარის კულტურული მემკვიდრეობის დაცვის სააგენტოს ხელმძღვანელმა ზონალური საბჭოს სხდომის შემდეგ გვითხრა. საბჭოს სხდომაზე დღეს, 3 ივლისს, ვაჟა-ფშაველას 13-ში ახალი საცხოვრებელი კორპუსის აშენების საკითხი განიხილეს. კომპანიას, რომელმაც ამ მისამართზე ისტორიული სახლი 2015 წელს დაანგრია, საბოლოო პასუხი ვერ უთხრეს, თუმცა საბჭოს წევრები უკვე მიუთითებენ სამართლებრივ მოცემულობაზე, რომლის მიხედვითაც, ძეგლის სტატუსი ვაჟა-ფშაველას 13-ს აღარ აქვს და უარის თქმის საფუძველი არ ექნებათ.
“შევამცირეთ სართულიანობა, 1800 კვადრატულ მეტრზე ვთქვით უარი, მეტი რა გავაკეთოთ?” – იკითხა სხდომაზე სოფო ნებიერიძემ, კომპანია „ბათინვესტის“ დირექტორმა. ეს კომპანია იგივე „სლავა 2015“-ია, რომელსაც სასამართლოში კულტურული მემკვიდრეობის სააგენტო ისტორიული სახლის პირვანდელი სახით აღდგენას სთხოვდა. დაწყებული იყო გამოძიებაც, თუმცა გამოძიებას წლების გასვლის მიუხედავად არავინ დაუსჯია, ძეგლთა დაცვის სააგენტომ კი ვაჟა-ფშაველას 13-ს სტატუსი მოუხსნა… ამჯერად კომპანიამ 8-სართულიანი საცხოვრებელი კორპუსის პროექტი წარმოადგინა სააგენტოში.
„ჩანს 9 სართული, მაგრამ ეს ერთი ტექნიკური სართულია,“ – დასძინა სოფო ნებიერიძემ.
“თქვენ დაანგრიეთ ისტორიული სახლი და ნებაყოფლობით შედით კანონთან კონფლიქტში. ეს მასშტაბი არის საშინელება,” – მიმართა კომპანიის დირექტორს საზოგადოება “ბათომის” წევრმა, ნინო ინაიშვილმა.
ნინო ინაიშვილი და საზოგადოება “ბათომი” კომერციულ ინტერესში დაადანაშაულა კომპანია „ბათინვესტის“ დირექტორმა, თუმცა სხდომაზე და ვერც სხდომის შემდეგ, სოფო ნებიერიძემ ვერ დაასახელა კონკრეტული არგუმენტი, რაც „კომერციულ დაინტერესებას“ დაადასტურებდა.
„იმდენი პროექტი ვიცი, რაზეც „ბათომს“ ხმა არ ამოუღია,“ – მოკლე კომენტარით შემოიფარგლა „ბათინვესტის“ დირექტორი, როცა მას ვთხოვეთ, ერთი რომელიმე კონკრეტული პროექტი მაინც დაესახელებინა.
პროექტის პირველ ეტაპზე შეთანხმებას არც ზონალური საბჭოს წევრი, დავით ზოიძე დაეთანხმა.
“თქვენს მიერ დაქირავებული ხელოვნებათმცოდნის დასკვნა წინააღმდეგობაშია თქვენივე პროექტთან. წერია დასკვნაში, რომ არ შეიძლება კლდიაშვილის ქუჩაზე დიდი მოცულობით შემოჭრა,” – აღნიშნა დავით ზოიძემ.
“კარგით, ირგვლივ სულ 11 და 12 სართულიანი ახალი კორპუსებია,” – მიმართა საბჭოს წევრებს სოფო ნებიერიძემ.
ზონალური საბჭოს კიდევ ერთი წევრი, ზვიად ბურჭულაძის აზრით კი, კომპანიის წარმოდგენილი პროექტით არ ჩანს, რა აშენდება ვაჟა-ფშაველას 13-ში და უფრო დეტალური ესკიზი უნდა წარმოადგინოს არქიტექტორმა.
იგივე პოზიცია აქვს ამ ეტაპზე ზონალური საბჭოს თავმჯდომარე ზაურ ახვლედიანსაც.
„9 სართული, რა თქმა უნდა, მაღალია ამ ადგილზე, მაგრამ შესაძლებელია 5 სართული იყოს საშინელება. მე მინახავს 7 და 8 სართულიანი შენობები ტალინსა და რიგაში, რომელიც ძალიან ეფექტური იყო,“ – აღნიშნა მან.
ვაჟა-ფშაველას 13, ესკიზი
მიუხედავად იმისა, რომ ვაჟა-ფშაველას 13-ში დღეს სასამართლო დავა აღარ მიმდინარეობს და პროკურატურამ ისტორიული სახლის დამანგრევლების დასჯაზე უარი თქვა, რა იქნება სამართლიანი? „სააგენტოს ხელმძღვანელი, პირველ რიგში, უნდა მოქმედებდეს კანონის ჩარჩოებში, მერე მიდიხარ სასამართლოში და აგებ, რადგან რა უფლება გაქვს, რომ მოსთხოვო ორსართულიანი სახლის აღდგენა, ძეგლთა დაცვის სააგენტო ხარ და ძეგლი არ არისო,“ – გვიპასუხა ზაურ ახვლედიანმა.
„მთავარია, რომ აღდგენა მოხდეს ისტორიული კონტექსტის გათვალისწინებით,“ – ეს შოთა გუჯაბიძემ გვითხრა, საზოგადოება „ბათომის“ დამფუძნებელმა, როცა ზონალური საბჭოს სხდომა დასრულდა.
ამ თემაზე:
https://batumelebi.netgazeti.ge/news/196633/
