დღეს, 3 ივლისს, აბიტურიენტები ზოგად უნარებში აბარებენ გამოცდას. ამ დროისთვის ორი აბიტურიენტია მოხსნილი თბილისის საგამოცდო ცენტრებიდან.
გამოცდების ეროვნული ცენტრის ინფორმაციით, ერთ შემთხვევაში, კონკრეტული ადამიანის ნაცვლად გამოცდაზე შესვლას სხვა პირი ცდილობდა და დაწყებულია გამოძიება, ხოლო ის აბიტურიენტი, რომლის ნაცვლადაც გამოცდის დაწერას სხვა ცდილობდა, გამოცდიდან მოიხსნა.
მეორე შემთხვევაში აბიტურიენტის გამოცდიდან მოხსნის მიზეზი გახდა ფარულად შეტანილი მობილური ტელეფონი, „რაც მალევე აღმოაჩინეს და აბიტურიენტი მოხსნეს გამოცდიდან,“ – აცხადებენ გამოცდების ეროვნულ ცენტრში.
გამოცდების ეროვნული ცენტრში გვითხრეს, რომ საგამოცდო ცენტრებში გახსნილია სამედიცინო დახმარების პუნქტები და მობილიზებულია სასწრაფო დახმარების ბრიგადა.
2019 წლის ეროვნულ გამოცდაზე 41 ათასამდე აბიტურიენტია რეგისტრირებული. წელს საქართველოს უნივერსიტეტები 41 ათასამდე სტუდენტის მიღებას აპირებენ.
შეფასებისა და გამოცდების ეროვნული ცენტრის ინფორმაციით, საქართველოს მასშტაბით 11 ქალაქში 23 საგამოცდო ცენტრია გახსნილი.
______________________
ფოტო: ერთიანი ეროვნული გამოცდები ბათუმში. ფოტო: „ბათუმელები“, თედო ჯორბენაძე
