ქართული წარმოშობის ამერიკელმა მუსიკოსმა ბათუმში მოზარდებს მასტერკლასი ჩაუტარა


დღეს, 3 ივლისს, ბათუმის ამერიკულ კუთხეში ინგლისური ენის ხელმისაწვდომობის მიკროსტიპენდიის პროგრამის (Access) მონაწილე მოზარდებს ქართული წარმოშობის ამერიკელმა მუსიკოსმა Mariami-მ მასტეკლასი ჩაუტარა. Access -ის პროგრამა ხელმისაწვდომია სოციალურად დაუცველი და დევნილი ბავშვებისთვისაც.

მუსიკოსი აშშ-ში, ნიუ-იორკში ცხოვრობს, მისი ოჯახი საქართველოდან დიდიხნის წინ წავიდა. მარიამის მუსიკა არის პოპის, ფოლკლორისა და სოულის ნაზავი. როგორც მუსიკოსმა „ბათუმელებს“ უთხრა, ის ახლა მეოთხე ალბომზე მუშაობს.

მარიამი (ბიბილური), პროგრამაში როგორც მოყვარული, ისე მონაწილეობს. ის მოზარდებს სიმღერის ტექნიკას ასწავლის, ასევე მუსიკის წერას და იმას, როგორ არ უნდა გააკეთონ პლაგიატი.

„სიმღერის დროს ძალიან მნიშვნელოვანია სუნთქვა, რადგან სუნთქვის დროს ჟანგბადი მიეწოდება ჩვენს ორგანიზმს, მათ შორის ტვინს. თუ ტვინი 6 წუთის განმავლობაში არ მიიღებს ჟანგბადს, მისი უჯრედები იწყებს კვდომას. ამიტომ სიმღერის დროს ჩვენ უნდა ვიცოდეთ ჟანგბადის სწორად გადანაწილება“, – ეუბნება ის მოზარდებს.

მარიამმა მოზარდებს სწორად სუნთქვისა და ბგერების სწორად წარმოთქმის მასტერკლასი ჩაუტარა. მომღერალმა მოზარდებს საკუთარი მუსიკაც გააცნო.

ქართული წარმოშობის ამერიკელი მუსიკოსის Mariami-ს მასტერკლასი ბათუმის ამერიკულ კუთხეში
ფოტო: ლელა დუმბაძე/„ბათუმელები“

მარიამი ამბობს, რომ ბოლო პერიოდში საქართველოში ხშირად ჩამოდის და ცდილობს, მეგობრებსაც გააცნოს თავისი ქვეყანა. „მე მუსიკალურ ოჯახში გავიზარდე, მამაჩემიც მუსიკოსია და სუხიშვილებთან აკორდეონს უკრავდა. მეც ძალიან მიყვარს ქართული ფოლკლორული მუსიკა. მე ამერიკელი მუსიკოსი ვარ, თუმცა მთელი არსებით მიყვარს ქართული კულტურა“, – გვეუბნება ის.

მარიამი ამბობს, რომ როგორც მოხალისე, ამერიკაშიც ასწავლის სხვადასხვა ქვეყნიდან ემიგრირებულ და ლტოლვილ ბავშვებს მუსიკას და მუსიკის სიყვარულს. „მეც ემიგრანტი ბავშვი ვარ და ხშირად ვესაუბრები მათ ჩემს გამოცდილებაზე, გრძნობებზე. ლტოლვილი ბავშვები ხშირად დათრგუნული არიან და უჭირთ ადაპტირება, მე მათ ვესაუბრები როგორ უნდა განავითარონ თავიანთი უნარები ხელოვნებაში და როგორ მიაღწიონ მიზანს“.

ფოტო: ლელა დუმბაძე/„ბათუმელები“

მარიამი ამბობს, რომ ნამდვილი მუსიკა არის გულიდან წამოსული და არა სახელმძღვანელოდან. „წარმატებისთვის მნიშვნელოვანია მოთმინება, მიზნის სიზუსტე და თანმიმდევრულობა. ასევე, რა თქმა უნდა, ნიჭი და განვითარება,“- გვეუბნება ის.

ინგლისური ენის ხელმისაწვდომობის სასტიპენდიო პროგრამას აშშ-ის საელჩო აფინანსებს და ახორციელებს ამერიკული ორგანიზაცია PH-International-ი. პროგრამა რამდენიმე წელია, რაც საქართველოში ხორციელდება.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com