შუახევში, სოფელ ბუთურაულის წყალთან მისასვლელი ინფრასტრუქტურა მოაწყვეს. ეს ის წყალია, რომელიც რამდენიმე ადგილობრივის მტკიცებით, სამკურნალოა და დიაბეტს კურნავს. ამ წყაროსთან თუნდაც გასულ წელს ცოცხალ რიგში ადამიანები საათობით იდგნენ. მაშინ აქ ინფრასტრუქტურა არ არსებობდა, ახლა სოფლის გზიდან წყალთან ჩასასვლელი გზა მოასფალტებულია, მისასვლელ ბილიკზე კი რკინის მოაჯირებია დამონტაჟებული. გზაზე ფანჩატურიც შეგხვდებათ და უკვე დამონტაჟებული განათების ბოძებიც.
ბუთურაულის წყალთან ჩასულებს გამოკეტილი დაგვხვდა ადგილი, სადაც წყაროს წყალი სპეციალურ რეზერვუარში გროვდება. წყლის ადგილი ღობითაა შემოსაზღვრული. იქვეა ჯიხურიც, რომლის ფანჯარაზე მიწერილ ტელეფონის ნომერზე დარეკვის შემდეგ ერთი პირი მოვიდა. მან გვითხრა, რომ წყლის ოდენობა ზაფხულობით იკლებს და ამიტომაც მას რეზერვუარში აგროვებენ. მისივე თქმით, წყლით სარგებლობა უფასოა.
რის საფუძველზე გადაწყვიტა მერიამ ბუთურაულის წყალთან მისასვლელ გზაზე ინფრასტრუქტურის კეთილმოწყობა? – „აქ ულამაზესი ბუნებაა. ტურისტულად აქტიური ზონაა და მოსახლეობის მოთხოვნიდან გამომდინარე მერიამ მიიღო შესაბამისი გადაწყვეტილება“, – გვითხრა შუახევის მერის მოადგილემ, ომარ ტაკიძემ. მისი თქმით, ბუთურაულის წყალთან მისასვლელი ინფრასტრუქტურის მოწყობაში 32 ათასი ლარი დაიხარჯა.
ომარ ტაკიძეს ვკითხეთ, დადგინდა თუ არა ბუთურაულის წყლის სამკურნალო თვისებების შესახებ.
„აჭარის სოფლის მეურნეობის სამინისტროს ლაბორატორიაში გააკეთეს გამოკვლევა ქიმიურ-ბაქტერიოლოგიურ თვისებებზე. იგი შეიცავს სამკურნალო თვისებებს, კონკრეტულად რას კურნავს, არ ვიცი,“ – ამბობს შუახევის მერის მოადგილე. ის ლაბორატორიაში გაცემული დასკვნის გაცნობას დაგვპირდა, თუმცა დასკვნა ამ დრომდე არ მოუწოდებია.
„ბათუმელები“ დაუკავშირდა აჭარის სოფლის მეურნეობის სამინისტროს ლაბორატორიასაც.
„ასეთი კვლევა არ ჩაგვიტარებია… არც შემოსულა წყალი საკვლევად. რომ შემოვიდეს, ჩვენ ვერ დავადგენთ წყალი სამკურნალოა თუ არა. აჭარაში ასეთი კვლევა საერთოდ არ ტარდება,“ – გვითხრა რამაზ სურმანიძემ, აჭარის სოფლის მეურნეობის ლაბორატორიის ხელმძღვანელმა.
სოფელი ბუთურაული, ფოტო: ბათუმელები
სოფელი ბუთურაული, ფოტო: ბათუმელები
სოფელი ბუთურაული, ფოტო: ბათუმელები
სოფელი ბუთურაული, ფოტო: ბათუმელები
სოფელი ბუთურაული, ფოტო: ბათუმელები
