5 ივლისს ბათუმში, „თავისუფალ სივრცეში“, წარმოდეგნილი იქნება რეჟისორ ლაშა შეროზიას მონოსპექტაკლი – „დაბადების დღე“ ჟესტურ ენაზე. სპექტაკლი ადაპტირებულია და მორგებულია სმენისარმქონე და სმენადაქვეითებულ ადამიანებზე.
ადაპტირებული სპექტაკლი პირველად კეთდება ბათუმში, პროeქტ „მედიArt2“-ის ფარგლებში, რომელსაც ახორციელებს ახალგაზრდული ორგანიზაცია „ცვლილებები თანაბარი უფლებებისათვის“.
„სპექტაკლი „დაბადების დღე“ მოგვითხრობს ახალგაზრდა გოგოს ისტორიას და წარსულთან ფსიქო-ემოციურ გამოთხოვებას ახალი ცხოვრების დასაწყებად,“ – ნათქვამია ანოტაციაში.
სპექტაკლში თამაშობს მსახიობი ინგა კირცხალი, სურდო თარჯიმანი კი სოფი იაკობიძეა.
პროექტი ხორციელდება სოციალურ საწარმო კაფე „თავისუფალ სივრცეში“. სპექტაკლი მიმდინარეობს სრულად ჟესტურ ენაზე, სინქრონული ხმოვანი თარგმანით და განკუთვნილია როგორც სმენის არმქონე, ასევე, სმენის მქონე ადამიანებისთვის.
მონოსპექტაკლი „დაბადების დღე“ თავისუფალ სივრცეში გაიმართება.
