მოსახლეობამ გადაკეტა ხულოს ცენტრალური გზა ადიგენის მიმართულებით


ხულოს მუნიციპალიტეტში სოფელ პაქსაძეების მოსახლეობამ დღეს, პირველ ივლისს, პროტესტის ნიშნად ხულოს ცენტრალური გზა გადაკეტა.

მოსახლეობა ადიგენისა და გოდერძის უღელტეხილის მიმართულებით გზის მოწესრიგებას მოითხოვს. მათი განცხადებით, ამ მიმართულებით ზამთარში გადაადგილება შეუძლებელია.

„ყველა არჩევნების წინ მთავრობა გზის რეაბილიტაციას გვპირდება, თუმცა უშედეგოდ“, – ამბობენ აქციის მონაწილეები.

აქციის მონაწილეებთან იმყოფება ორგანიზაცია „ჩვენი უფლებებისთვის“ ხელმძღვანელი თამაზ ბაკურიძე, რომელიც ამბობს, რომ აქციის მონაწილეებს ხულოს მერი ვახტანგ ბერიძე შეხვდა.

„მერი მოსახლეობას დაჰპირდა, რომ გზის კეთილმოწყობა უმოკლეს ვადაში დაიწყება“.

ამ დაპირების შემდეგ მოსახლეობამ გზის გადაკეტილი მონაკვეთი გაათავისუფლა. ისინი ამბობენ, რომ თუ მერი დანაპირებს არ შესრულებს, მოსახლეობა აქციებს გააგრძელებს.

სოფელ პაქსაძეების მოსახლეობამ გზის რეაბილიტაციის მოთხოვნით ხულოს ცენტრალური მაგისტრალი გადაკეტა

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com