ტალინიდან პირველი ჩარტერული რეისით ბათუმში 180 ტურისტი ჩამოვიდა


27 ივნისს ტალინიდან ბათუმის მიმართულებით პირველი ჩარტერული რეისი შესრულდა.

ჩარტერული რეისით ბათუმში 180 ტურისტი ჩამოვიდა, რომელთა 90%-იც რეგიონში ერთი კვირით გეგმავს დარჩენას და მოგზაურობას.

ავიაკომპანია Smartlynx Airlines-ის ჩარტერული რეისები ბათუმში ტალინიდან კვირაში ერთხელ, Airbus A320 საჰაერო ხომალდით შესრულდება.

ტალინიდან ჩამოფრენილ მგზავრებს ბათუმის აეროპორტში აჭარის ტურიზმის დეპარტამენტის თავმჯდომარე თინათინ ზოიძე დახვდა.

„ესტონეთი აჭარისთვის ახალი ტურისტული ბაზარია, სადაც რეგიონის რეკლამირებას ბოლო წლებია აქტიურად ვახორციელებთ. ამ წუთებშიც, ტალინის ქუჩებში რეგიონის საიმიჯო ფოტოებით დაბრენდილი ტრამვაი იქცევს ესტონელების ყურადღებას. იზრდება აჭარაში ესტონელი მოგზაურების რაოდენობაც, რაც რეგიონის ადმინისტრაციული საზღვრის კვეთის 5 თვის მონაცემებზე დაყრდნობით 59%-იან მატებას ითვალისწინებს. ჩვენი სტრატეგიაც, რომლის მიხედვითაც ბოლო წლებია აჭარის პოპულარიზაციას 16 სამიზნე ქვეყანაში ვეწევით სწორედ ბაზრების დივერსიფიკაციასა და მეტი ევროპელი ტურისტის რეგიონში მოზიდვას ემსახურება. შედეგად სახეზეა ჩარტერები ევროპული ქვეყნებიდან. ჯერ გვაქვს ტალინი და მალე დაგვემატება ფრენები ვილნიუსიდანაც,“ – განაცხადა თინათინ ზოიძემ.

აჭარის ტურიზმისა და კურორტების დეპარტამენტის ცნობით, ტალინიდან ბათუმის მიმართულებით ჩარტერული ფრენები ტურისტული კომპანიების – „აჭარა ტურისა“ და Tez Tour-ის ორგანიზებით ხორციელდება.

___________

ფოტო: აჭარის ტურიზმისა და კურორტების დეპარტამენტი

 

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.