საქართველოს პარლამენტში ბიუროს სხდომა დასრულდა. უმრავლესობის წევრებმა მხარი დაუჭირეს დეპუტატ ნიკა მელიას დაკავებაზე თანხმობის მიცემის საკითხის პლენარული სხდომის საკითხებში შეტანას. კენჭისყრაში მონაწილეობა პროტესტის ნიშნად არ მიიღო ოპოზიციამ. პლენარულ სხდომაზე პროკურატურისთვის თანხმობას მიცემის შემთხვევაში, შესაძლოა მელია პარლამენტშივე დააკავონ.
პროკურატურამ დეპუტატ მელიაზე ბრალის წარდგენის დადგენილება გუშინ, 25 ივნისს მიიღო და გუშინვე მიმართა პარლამენტს დეპუტატისთვის აღკვეთის ღონისძიებად პატიმრობის გამოყენებაზე დასათანხმებლად.
ნიკა მელიას, რომლის წინააღმდეგაც პროკურატურამ სამართლებრივი დევნა დაიწყო, ბრალის დამტკიცების შემთხვევაში 6-დან 9 წლამდე პატიმრობა ემუქრება.
პროკურატურის ინფორმაციით, “აქციის მიმდინარეობისას ჯგუფური ძალადობის ხელმძღვანელობის და მასში მონაწილეობისთვის ნიკანორ მელიას მიმართ გამოტანილია ბრალდების დადგენილება საქართველოს სისხლის სამართლის კოდექსის 225-ე მუხლის პირველი და მეორე ნაწილებით”.
ამ მუხლის პირველი ნაწილი გულისხმობს:
ჯგუფური მოქმედების ორგანიზება ან ხელმძღვანელობა, რასაც თან ახლავს ძალადობა, რბევა, სხვისი ნივთის დაზიანება ან განადგურება, იარაღის გამოყენება, იარაღის გამოყენებით ხელისუფლების წარმომადგენლისადმი წინააღმდეგობა ანდა მათზე თავდასხმა, – ისჯება თავისუფლების აღკვეთით ვადით ექვსიდან ცხრა წლამდე.
მეორე მუხლი კი გულისხმობს ამ მუხლის პირველი ნაწილით გათვალისწინებულ ქმედებაში მონაწილეობას, რაც ისჯება თავისუფლების აღკვეთით ვადით ოთხიდან ექვს წლამდე.
შენიშვნა: ამ მუხლის მიზნებისათვის იარაღში იგულისხმება ცეცხლსასროლი იარაღი, საბრძოლო მასალა, ფეთქებადი ან ადვილაალებადი ნივთიერება, ასაფეთქებელი მოწყობილობა, ცრემლმდენი, რადიოაქტიური, ნერვულ-პარალიტიკური მოქმედების ან მომწამვლელი ნივთიერება, ცივი იარაღი ანდა ნებისმიერი მოწყობილობა ან საგანი, რომელიც შეიძლება გამოყენებულ იქნეს ცოცხალი ან სხვა ობიექტის დასაზიანებლად ანდა გასანადგურებლად.
https://netgazeti.ge/news/375790/
