ბათუმში, მერაბ კოსტავას მემორიალთან, „ეროვნული მოძრაობის“ წევრები და პირველი მოწვევის უზენაესი საბჭოს ყოფილი დეპუტატები შეიკრიბნენ. მათ მერაბ კოსტავას დაბადებიდან 80 წლისთავი აღნიშნეს და კიდევ ერთხელ გააპროტესტეს ის, რომ ამ დრომდე მერაბ კოსტავასთვის ბათუმში ძეგლი არ დაუდგამთ.
„სირცხვილია, რომ ჩვენ ისევ ვდგავართ ქვასთან, რომელიც აქ 1994 წელს გაჩნდა… ქვაზე წერია, რომ აქ უნდა აღიმართოს მერაბ კოსტავას ძეგლი. ხელისუფლებას არ ახსოვს მერაბ კოსტავა, რომელიც ეროვნული გმირი იყო. არც ზვიად გამსახურდიას გახსენება უნდათ, რადგან ის იყო დამოუკიდებლობის პირველი მესაძირკვლე და ამ ადამიანების გარეშე არავითარი დამოუკიდებლობა არ იქნებოდა,“ – ამბობს აჭარის პირველი მოწვევის უზენაესი საბჭოს წევრი, ნუგზარ ჩხაიძე.
მერაბ კოსტავას მემორიალთან შეკრებილები მიიჩნევენ, რომ დამოუკიდებლობის დღე 9 აპრილს უნდა აღინიშნებოდეს და არა 26 მაისს.
„26 მაისი, რა თქმა უნდა, არის ისტორიული თარიღი, მაგრამ ის სახელმწიფო გაქრა პოლიტიკური რუკიდან და დღეს ჩვენი დამოუკიდებლობა ეფუძნება 1991 წლის 31 მარტს ჩატარებულ რეფერენდუმს, ამის საფუძველზე გვცნო ჩვენ გაერომ და ვართ მსოფლიო თანამეგობრობის წევრი. დამოუკიდებლობის ათვლა ხდება 1991 წლიდან… ამას არ აკეთებენ მიზანმიმართულად, რადგან ამ დრომდე არ გამოუძიებიათ ვინ მოაწყო დამოუკიდებელი საქართველოს პირველი ხელისუფლების გადატრიალება, მათ შორის, ზოგიერთი დღესაც თანამდებობის პირია,“ – გვითხრა ნუგზარ ჩხაიძემ.
