საერთაშორისო მუსიკალური ფესტივალი ბათუმის კოლონადებთან

პირველად ბათუმში საერთაშორისო მუსიკალური ფესტივალი გაიმართება, რომელიც ივლისის თვეშია დაგეგმილი. ფესტივალის ფარგლებში საქართველოს რამდენიმე ქვეყნიდან ეწვევიან მუსიკოსები, მათ შორის იტალიიდან.

როგორც აჭარის განათლებისა და კულტურის სამინისტროში „ბათუმელებს“ უთხრეს, ფესტივალის – „ბათუმის ცის ქვეშ“ პროექტის ავტორია ბათუმის მუსიკალური ცენტრის წამყვანი სოლისტი ინგა ჯახუტაშვილი.

„ბათუმის მუსიკალური ცენტრი წლების განმავლობაში თანამშრომლობს ცნობილ იტალიელ დირიჟორთან, ლორენცო ტაციერთან. სწორედ მისი დამსახურებაა, რომ საქართველო, კონკრეტულად ბათუმი, გახდა გენუის ახალგაზრდა მუსიკოსთა საერთაშორისო ფესტივალის მონაწილე. მას ევროკავშირის ფონდებმა და გენუის მუნიციპალიტეტმა დაუფინანსეს ფესტივალი, სადაც რამდენიმე ქვეყანაა გაერთიანებული, მათ შორის ევროკავშირის ქვეყნებიც და ახლა უკვე საქართველო,“ – გვითხრა თეა ჭანტურიშვილმა, სამინისტროს კულტურის დეპარტამენტის ხელმძღვანელმა.

მისი თქმით, ლორენცო ტაციერი წელს გენუის კულტურის ელჩი გახდა. „სწორედ ამ ადამიანის დამსახურებით იმყოფებოდა ორჯერ ბათუმის მუსიკალური ცენტრი იორდანიაში, საოპერო ფესტივალზე და აქედან ჩამოყალიბდა საქმიანი ურთიერთობებიც“.

ფესტივალი ივლისში გაიმართება ბათუმის ბულვარში, კოლონადებთან. ჯერ კონკრეტული თარიღი გადაწყვეტილი არ არის. „შესაძლებელია, ეს იყოს 25 ივლისი. გვინდა ფესტივალი ორდღიანი იყოს. გახდება თუ არა ფესტივალი ყოველწლიური, ეს დამოკიდებულია იმაზე, წელს როგორ ჩაივლის“.

ფესტივალის ბიუჯეტი 56 ათასი ლარია. ფესტივალზე წარმოდგენილი იქნება ცნობილი საოპერო არიები და საოპერო უვერტიურები. ფესტივალზე დასწრება თავისუფალია.

თეა ჭანტურიშვილის თქმით, ფესტივალზე ჩამოვა ჩინეთის სიმფონიური ორკესტრი, დირიჟორი კი თავად  ლორენცო ტაციერი იქნება. ასევე ჩამოვლენ მუსიკოსები სხვადასხვა ქვეყნიდან: „ამ ეტაპზე  კონკრეტულ ქვეყნებთან მოლაპარაკებები მიმდინარეობს.

ეს პერიოდი აქტიურია ტურისტულად, ამიტომ ვგეგმავთ დავარიგოთ ფლაერები სასტუმროებშიც, რომ ბევრი სტუმარი დაესწროს ფესტივალს. ვფიქრობ, კარგი სანახაობა იქნება.

ფესტივალს ყველა მონაწილე ქვეყანა მასპინძლობს, დახურვა კი 29 ივლისს იქნება გენუაშია. გვინდა, დახურვაში ჩვენმა შემსრულებლებმაც მიიღონ მონაწილეობა“.

როგორც ჭანტურიშვილმა გვითხრა, ფესტივალი ძირითადად კლასიკურია, თუმცა შესაძლებელია სხვა ჟანრის გატანაც. „გვინდა, კლასიკურ მუსიკასთან ერთად ფოლკლორიც გავიტანოთ, ამაზეც მიდის მოლაპარაკებები, რადგან ეს კარგი ტრიუკია ტურისტული თვალსაზრისით“.

თეა ჭანტურიშვილის თქმით, ამ ურთიერთობების მთავარი მესიჯი არის ევროპა-საქართველო. „ეს არის მთავარი გათვლა, რადგან ამ ურთიერთობებით ჩვენ შევდივართ ევროპულ კულტურასთან ინტეგრაციაში. ფესტივალში მონაწილეობს ჩინეთიც, რომელიც უმნიშვნელოვანესი კვანძია და კულტურული ხიდი აღმოსავლეთსა და ევროპას შორის“.

მთავარი ფოტო: ლორენცო ტაციერი, დირიჟორის ფეისბუქგვერდიდან.