საქართველოს დამოუკიდებლობის დღე, 26 მაისი, ბათუმში სხვადასხვა ღონისძიებით აღინიშნება ევროპის მოედანსა და მემედ აბაშიძის გამზირზე. ბათუმის მერიამ ღონისძიებათა ჩამონათვალი უკვე გამოაქვეყნა.
მერიის ცნობით, ღონისძიებები ევროპის მოედანზე 13:00 საათზე დაიწყება და 22:30 საათამდე გაგრძელდება.
მემედ აბაშიძის გამზირზე გაიმართება ქართული ბაზარი, სადაც გამოფენილი იქნება ხელნაკეთი აქსესუარები, ხალხური რეწვის ნიმუშები და ადგილობრივი ნაწარმი.
მოეწყობა ნობელების მუზეუმის, მხარეთმცოდნეობის მუზეუმისა და საჯარო ბიბლიოთეკის ექსპონატების გამოფენა.
საბავშვო კუთხეში გაიმართება სპორტული და მხიარული შეჯიბრებები, საბავშვო შემეცნებითი, გასართობი ღონისძიებები, თემატური თამაშები, სახეზე მოხატვა. საბავშვო კუთხე მორთული იქნება ბუშტებითა და დროშებით. ღონისძიებას გააფორმებენ ზღაპრის გმირები.
ევროპის მოედანზე, სცენაზე, იმღერებენ „კახაბერი და ხანუმები“, ნოდიკო ტატიშვილი, სოფო ბედია, აჩიკო ნიჟარაძე, სალომე ბაკურაძე, დათუნა მგელაძე, აჩიკო გოგიტიძე, მორის მელაძე, ავთო აბესლამიძე, ვაჟა ტუღუში, გიორგი დიასამიძე, ასევე, ჯგუფები “რესპექთ“, “ეროუ“, “4 up” და “ლურჯი იალქანი“.
ღონისძიება ღამით ფეიერვერკით დასრულდება.
