„აჭარის ალტერნატიული მთავრობის“ წევრი, ენმ-ის აქტივისტი ხათუნა ბერიძე, „ქართული ოცნების“ დეპუტატის, ანზორ ბოლქვაძის სასტუმროდან ვერ გამოაძევეს.
ხათუნა ბერიძემ, გუშინ, 7 მაისს, გვიან ღამით ატვირთა ვიდეო, სადაც საქართველოს პარლამენტის წევრი ანზორ ბოლქვაძე ხათუნა ბერიძეს სასტუმროს ნომრის დატოვებას სთხოვს, თუმცა კონკრეტულ მიზეზს არ ასახელებს. ხათუნა ბერიძე „ბათუმელებთან“ ამბობს, რომ ის სასტუმრო „ხულოში“ გუშინ შევიდა და დღეს 8 მაისის ჩათვლით, იქ ცხოვრების უფლება აქვს.
„მე არ ვიცოდი თუ ეს სასტუმრო ანზორ ბოლქვაძის იყო, ეს გავიგე მხოლოდ მას შემდეგ, როცა ის სასტუმროში დავინახე. მოტივი არ ვიცი, რატომ ითხოვდნენ ჩემგან სასტუმროს დატოვებას, არ განუმარტავთ. თუმცა, როგორც მოგვიანებით გაირკვა, ეს უკავშირდებოდა ჩემს პოლიტიკურ აქტიურობას, რადგან მე ვარ „ერთიანი ნაციონალური მოძრაობის“ და „აჭარის ალტერნატიული მთავრობის“ წევრი. იყო უშვერი სიტყვები, ახსენებდნენ პროვოკაციას“.
ვიდეოჩანაწერში ანზორ ბოლქვაძე ახსენებდა ვინმე ხალვაშს, როგორც ხათუნა ბერიძე ამბობს, აქ საუბარი იყო ენმ-ს წევრ გია ხალვაშზე, რომელმაც გუშინ მეხანძრეებისთვის უნიფორმების გადაცემის დროს აჭარის მთავრობის თავმჯდომარეს, თორნიკე რიჟვაძეს კითხვები დაუსვა.
„გუშინ მეხანძრეებს გადასცეს უნიფორმები და იქ იკითხა გია ხალვაშმა თუ რატომ დაურიგეს ფორმები და ტექნიკა ახლა, როცა ეს უნიფორმები ნაყიდი იყო ჯერ კიდევ ზამთარში და ხომ არ უკავშირდებოდა ეს ხულოში მერის არჩევნებს.“
მას შემდეგ, რაც ანზორ ბოლქვაძემ, ხათუნა ბერიძისგან კატეგორიულად მოითხოვა სასტუმროს დატოვება, მან პოლიცია გამოიძახა. „მათი ქმედება იყო უკანონო, რადგან ისინი შემოიჭრნენ ჩემს ნომერში დაუკითხავად. არ განმიმარტეს რეალური მოტივი და კანონდარღვევით ითხოვდნენ ნომრის დაცლას. ორჯერ გამოვიძახე პოლიცია და შედგა აქტიც“, – ამბობს ხათუნა ბერიძე.
მისი თქმით, ის ხულოში პირადი საქმეზე იმყოფებოდა. „ამ შემთხვევაში არ ვიყავი პოლიტიკური მიზნით ხულოში, ტურისტული კომპანია მაქვს და ჩემი პირადი საქმეების გამო ვიყავი იქ“.
ხათუნა ბერიძე დღეს 8 მაისს, 11:30 საათზე ენმ-ს ოფისში ამ საკითხზე ბრიფინგს გამართავს.
სასტუმრო „ხულო“ პარლამენტარ ანზორ ბოლქვაძის საკუთრებაშია
