“ჯიგრები” ორი მეგობრის მიერ შექმნილი სტარტაპია, რომელიც მხატვრებს სამუშაოს პოვნის საშუალებას აძლევს. როგორც მისი დამფუძნებლები ამბობენ, კომპანია ერთგვარი მედიატორის როლს შეასრულებს მხატვარსა და დამკვეთს შორის. “ჯიგრები”, ერთი მხრივ, ადამიანებს, რომლებსაც სურთ თავიანთი სახლის, ოფისის ან თუნდაც გარე კედლების მოხატვა, დაეხმარება მხატვრის მოძიებაში, მეორე მხრივ კი, მხატვრებს – სამსახურის პოვნაში.
„სამი მიმართულება გვაქვს. მხატვარს აუცილებლად სჭირდება მენეჯერი. თუკი მხატვარს კარგი ხელი აქვს, ეს არ ნიშნავს იმას, რომ ინგლისურად პროექტის წერა იცის და დაუწერს რომელიმე ფონდს პროექტს. ამ მხატვარს სჭირდება ამ კუთხით პატრონობა, ხარჯთაღრიცხვა და დოკუმენტაციის მოწესრიგება. ჩვენი დახმარებით ამაზე ზრუნვა აღარ მოუწევს. მეორე მხრივ, როდესაც საჯარო ბაღს უნდა კედლის მოხატვა, ის კერძო პირს ვერ დაავალებს. რაღაც სტრუქტურას უნდა დაავალოს, იურიდიულად უნდა გაფორმდეს. ამიტომ ვართ საჭირო ჩვენ, მედიატორები. მესამე მიმართულება არის ბაზების შექმნა და შემდეგ ამის კონტროლი, 24/7-ზე შეთავაზებების გაკეთება მხატვრებისთვის,” – ამბობს ნიკა ბაძაღუა, “ჯიგრების” ერთ-ერთი დამფუძნებელი.
ახლად შექმნილ ორგანიზაციაში ჯერჯერობით ცხრა ხელოვანია გაწევრიანებული.
